Tатл останува шефица на Берлинале откако го прифати „кодексот на однесување за антисемитизам“
Стотици актери, режисери и глобални директори објавија отворено писмо „во поддршка на желбата на Триша Татл да продолжи како директорка на фестивалот во Берлинале“
Берлин – Шефицата на Берлинскиот филмски фестивал, Триша Татл останува на чело на Берлинскиот филмски фестивал, но ќе биде должна да се потчини на нови услови, вклучувајќи „кодекс на однесување“ со „табу за антисемитизам“, според извештаите во германските медиуми.
Конзервативниот германски таблоид „Билд“, кој го предводеше барањето за отпуштање на Татл, објави дека германското Министерство за култура не можело да се согласи за условите за договор за разделба со Татл, на која ѝ остануваат уште три години од нејзиниот петгодишен договор со фестивалот.
Наместо тоа, пишува „Билд“, повикувајќи се на неименувани владини извори, Татл ќе остане директорка на Берлинскиот филмски фестивал, но се согласила да прифати нов советодавен одбор и кодекс на однесување што сите учесници на фестивалот ќе треба да го потпишат. Кодексот, според „Билд“, ќе вклучува „табу против антисемитизмот што важи за сите учесници“.
Татл е под критики уште од церемонијата на доделување награди на Берлинале на 21 февруари, кога голем број филмски режисери дадоа пропалестински изјави од сцената. Сириско-палестинскиот режисер Абдала Ал-Хатиб, добитник на главната награда во делот „Перспективи“ за „Хроники од опсадата“, го искористи својот говор за да ја нападне германската влада, обвинувајќи ја дека „се партнери во геноцидот во Газа од страна на Израел“. Како одговор, германскиот федерален министер за животна средина Карстен Шнајдер ја напушти церемонијата.
Татл беше критикувана и во германските десничарски медиуми за премиерната фотографија направена со екипата на „Хрониките од опсадата“ на 15 февруари, на која се гледа како стои покрај филмски работници кои носат кефии и држат палестински знамиња.
Во интервју за германскиот весник „Рајнишен пост“ во понеделник, германскиот министер за култура Волфрам Вајмер употреби термини како „говор на омраза“, „напади на активисти“ и „омраза кон Израел“ за да ги опише настаните на Берлиналето оваа година, нагласувајќи ја важноста на нов кодекс на однесување за да се спречат во иднина. Германската влада е главен финансиски поддржувач на Берлиналето, одговорна за околу 40 проценти од неговиот буџет.
Ништо од ова – изјавите на Ал-Хатиб, кефиите или знамињата – не е противзаконско во Германија. Како новиот кодекс на однесување на Берлиналето ќе биде компатибилен со германските закони за слобода на говорот останува отворено прашање. „Билд“ објави дека германското Министерство за култура, исто така, сака Татл да „привлече повеќе холивудски [ѕвезди] во Берлин“. Исто така, не е јасно како спроведувањето на политичката цензура ќе ја постигне таа цел.
Повиците за реформа на Берлиналето дојдоа првенствено од редовите на конзервативната партија ЦДУ, која ја предводи владејачката коалиција во Германија. Во разговор за „Билд“ минатата недела, пратеничката од ЦДУ, Елен Демут, која е членка на парламентарниот комитет за култура и медиуми, рече дека „на најважниот филмски фестивал во Германија му е потребна фундаментална реконструкција“ и дека дискусиите „на крајот мора да доведат до замена на Триша Татл како директорка на Берлиналето“.
Но, Свен Леман, член на Зелената партија и претседател на комитетот за култура и медиуми, рече дека е „апсолутно воодушевен што Триша Татл сака да остане“ како раководител на фестивалот. „Особено во светлината на кампањата што се водеше против неа минатата недела, ова ја покажува нејзината извонредна сила и длабока посветеност на Берлиналето и уметноста на филмот“, рече Леман во изјава на неговата официјална веб-страница во вторник. „Државниот министер за култура Вајмер изгуби голема доверба преку своите постапки во последните денови. „Сега е до него да ја врати оваа доверба – и со Триша Татл и тимот на Берлинале, и со германската и меѓународната културна сцена“, продолжи тој. „Очекувам Федералната влада и Берлинале да развијат одржлив план за иднината на Берлинале, вклучително и како да се справат со поларизирачките политички изјави. Берлинале треба да остане место на слободна култура и размена, а не место на заплашување.“
Како одговор на повиците за нејзино отпуштање, стотици актери, режисери и професионалци од филмската индустрија, вклучувајќи ги Шон Бејкер, Тилда Свинтон, Вики Крипс и Вим Вендерс, излегоа во поддршка на Татл. Во вторник, 32 глобални директори на филмски фестивали, вклучувајќи ги Тиери Фремо од Кан, Јуџин Ернандез од Санденс и Камерон Бејли од TIFF, објавија отворено писмо „во поддршка на желбата на Триша Татл да продолжи како директорка на фестивалот во Берлинале“. (Холивуд репортер)