Судбината на земјата не зависи од Таравари, вели Ковачевски

Лидерот на СДСМ ја намали важноста на претседателот на Алијансдата за Албанците во политичките процеси во Македонија и го нарече „политичарот од Гостивар“


Арбен Таравари и Димитар Ковачевски за време на нивната последна средба на 1 февруари

 

Минатата недела се среќаваше со него, а сега вели дека судбината на Македонија не зависи од градоначалникот на Гостивар.

Претседателот на СДСМ, Димитар Ковачевски, денеска ја намали важноста на лидерот на Алијансата за Албанците, Арбен Таравари, по драмата што се случува во неговата партија и разрешувањето на министрите за здравство и информатичка технологија. Ковачевски не мисли дека веќе не постоел европскиот фронт. Тој дури и го нарече Таравари „политичар од Гостивар“.

„Европскиот фронт за кој се залагаме постои и тоа се гледа на дело. Не можеме европската интеграција на државата да ја ограничиме на тоа дали господинот Арбен Таравари поминал од власт во опозиција. Јас не сметам дека Таравари е толку судбоносен за иднината на државата“, изјави Ковачевски на денешната прес-конференција со претседателот на Социјалдемократската партија на Германија Ларс Клингбеил прашан дали сѐ уште постои европскиот фронт.

Тој рече: „Апсолутно дека постои европскиот фронт и вие тоа го гледате и на дело. Ние имаме мнозинство во Парламентот кое се залага за евроинтеграција на државата. Во нашата држава има политички партии кои што се за европска интеграција на државата. Ние не можеме европската интеграција на државата да ја ограничиме на тоа дали господинот Таравари поминал од власт во опозиција. Јас не сметам дека Таравари е толку судбоносен за иднината на државата. Сепак се работи за политичар од Гостивар кој е успешен доктор, кој прави свои политички калкулации“, рече Ковачевски.

Иднината на државата не може да зависи од еден човек или од една политичка партија, тоа е сепак општествен процес, мисли лидерот на СДСМ.

„Немој да заборавите дека СДСМ е најголемата партија. СДСМ е во коалиција со либералите, со зелените и со голем број други политички партии кои имаат идеолошки концепт. Тоа се партии кои обезбедија членство во НАТО, обезбедија отпочнување на преговорите со ЕУ. Тоа се политички партии кои ќе обезбедат целосно зачленување на Македонија во ЕУ, додаде Ковачевски.

Според Ковачевски, без СДСМ нема европска Македонија. Тој потенцираше дека СДСМ ќе биде секогаш тука за подобрување на животниот стандард за интеграција на државата.

„Мислам дека господинот Таравари не е клучен за иднината на државата“, додаде Ковачевски. 

Во четвртокот вечерта, по собирот на неговото крило во Куманово Арбен Таравари изјави дека тој останува во условно наречениот европски фронт и се обиде да се дистанцира од забелешките дека ќе биде со ВМРО-ДПМНЕ во постизборните математики.

„Со целосна одговорност велиме дека нема да станеме дел од влада која не би ги направила уставните измени и која не прифаќа почеток на преговорите со ЕУ“, рече Таравари. (Н.В.)