Стотици илјади луѓе на улиците на Шпанија поради зголемените цени на киријата

Стотици илјади луѓе излегоа на улиците во 40 шпански градови за да протестираат против зголемените кирии и недостигот на прифатливи домови во земјата која ужива во најбрзиот економски раст во Европа, и каде што проблем е големиот недостиг на станбени единици поради туризмот.

Шпанската левичарска влада се бори да постигне рамнотежа помеѓу привлекување туристи и мигранти за да ги пополни празнините со работници, како и да ги одржи цените за изнајмување достапни за просечните граѓани, бидејќи становите за краткорочни наеми се повеќе почнуваат да се појавуваат во големите градови и крајбрежните дестинации.

„Без разлика кој е на власт, ние мора да ги браниме правата за домување“, скандираа активистите додека штракаа со приврзоци во Мадрид, каде што повеќе од 150.000 демонстранти маршираа низ центарот на главниот град, според локалниот синдикат на станари.

Просечните кирии во Шпанија се удвоиле, а цените на куќите пораснале за 44 отсто во текот на изминатата деценија, според веб-страницата за недвижности Idealista, многу повеќе од растот на платите.

Во меѓувреме, понудата на домови за изнајмување е намалена на половина од пандемијата во 2020 година.

Шеесет и петгодишна жителка на популарната населба Лавапиес вели дека ги тераат или иселуваат за да имаат станови за туристите. Изјави дека речиси 100 семејства кои живеат во нејзиниот блок добиле порака од сопственикот на зградата во која живеат дека нема да им се обновуваат договорите за закуп.

Здруженијата на сопственици на куќи и експертите велат дека сегашните регулативи ги обесхрабруваат долгорочните закупи, а сопствениците сметаат дека изнајмувањето на туристи или странци со денови или месеци е попрофитабилно и побезбедно.

Шпанија прими рекордни 94 милиони туристи во 2024 година, што ја прави втора најпосетувана земја во светот, како и илјадници мигранти, а тоа го зголемува дефицитот на станови од 500.000 домови, објави Банката на Шпанија.

Според официјалните податоци, само околу 120.000 нови домови се градат во Шпанија секоја година – шестина од нивото од пред финансиската криза во 2008 година, што го влошува веќе и онака акутниот недостиг на домови.