Стојков до Радев: Да, Бугарија ги тепаше своите граѓани со македонска самосвест!

Стојко Стојков од ОМО „Илинден – Пирин“ ја нарече „цинизам“ вчерашната лекција од бугарскиот претседател Румен Радев, кој освен што тврдеше дека новата македонска влада нема знаења за меѓународното право, уверуваше дека во Бугарија не се случува тепање на граѓани што декларираат друг идентитет, не се држат подалеку од позиции во јавната администрација, не се пука во нивните клубови, не се палат, не се држат подалеку  и слично. Ваквиот став стои и во реакцијата зад која застанаа Македонците во Бугарија.  

„Цинизам е претседател на држава каде што редовно се кршат човековите права и има толку многу критики од меѓународните институции за правата на човекот и толку многу пресуди во Судот за човекови права во Стразбур да ги изговори овие зборови. Да, Бугарија ги тепаше своите граѓани со македонска самосвест во годините на демократијата и, да – имаше напади врз македонски собири и врз македонски клубови. Разликата е што за тоа во Бугарија апсолутно никој не е суден, ниту осуден, ниту казнет. Никој не е дури ни вербално укорен, во медиумите или од политичари“, вели Стојков во изјава.

Тој уште додава:

„Не го слушнавме Радев да го осуди нападот врз македонскиот клуб ‘Никола Вапцаров’ во Благоевград, на пример, а ниту било кој бугарски политичар. Македонските политичари ги осудија нападите во Македонија и судот постапи по случаите. Тоа за Бугарија е несонив стандард.

Може ли Радев да посочи еден бугарски државјанин со македонски идентитет кој држи позиција во администрацијата сега или да држел во Бугарија во последните 60 години? Не може. Таков нема и не може да има. Но, лесно се сеќаваме на луѓе со бугарска самосвест кои држеле исклучително високи позиции во Македонија – Димитар Димитров, Младен Србиновски и други. Да се претставува тепан од своите другари по криминал за тепан поради бугарски идентитет само покажува колку нема аргументи Радев и колку бескрајно далеку се наоѓа тој од реалноста. Ние можеме да му цитираме десетици извештаи и ставови од Парламентарното собрание на Советот на Европа, Комитетот на министрите при Советот на Европа, комесарот за човекови права, Комисијата за борба против расизмот и дискриминацијата, Советодавниот комитет кон Рамковната конвенција за националните малцинства , годишните извештаи на Стејт департманот на САД, на Хелсинки воч, Амнести интернешенел, на Бугарскиот хелсиншки комитет, 14-те пресуди од Судот за човекови права од Стразбур и други, во кои на многу и различни начини се констатираат како нарушувањата на правата на Македонците во Бугарија. Радев никогаш нема заземено позиција по ниту еден од нив. Ниту бугарскиот омбудсман, ниту Комитетот против дискриминацијата, ниту бугарските судови. Никој.

Колку такви извештаи и пресуди тој може да цитира за наводното кршење на правата на Бугарите во Македонија? Навистина се работи за двојни стандарди. Но, гредата е во окото на Радев и неговата држава“, порачаа Стојко Стојков од ОМО „Илинден – Пирин“ и генерално Македонците од Бугарија.

Во вчерашната изјава, по средбата со грчкиот премиер Кирјакос Мицотакис на која се се зборувало и за потезите на новата влада во  Македонија, Радев рече дека моделот на бугарскиот Устав и на оној на Македонија се многу различни, бидејќи нашиот штити колективни, а нивниот индивидуални права, фраза зад која се крие непризнавањето на малцинствата.

„Потребно е и познавање на статистиката“, рече претседателот Радев и додаде дека најмалку 120.000 граѓани на Република Северна Македонија добиле бугарско државјанство врз основа на доказ за потеклото.

Неговата изјава беше реакција на пораката од новиот премиер Христијан Мицкоски дека ако еднаш по барање на Бугарија можел да се репреговара Договорот за пријателство, може и вторпат сега – за да се вклучи внатре признавањето на правата на македонското малцинство. (С.Ј.)