Средбата на Лавров и Кулеба заврши без резултат. Лавров тврди – Русија не ја нападна Украина

Кулеба, според ставовите на Лавров, заклучи дека Русија ќе продолжи со својата агресија сѐ додека Украина не ги исполни барањата на Москва. Тој изјави дека Киев ќе продолжи да бара „балансирано“ дипломатско решение за кризата и дека исполнувањето на барањата на Русија би било предавство. Според него, тие се за дипломатија, но и дека се подготвени да се бранат.

„Не можеме да ја запреме војната ако државата што ја почна агресијата не го сака тоа“, посочи тој.

Лавров, пак, возврати со обвинувања и со тврдења дека нападнатата болница во Мариупол била мета бидејќи таму имало борци на т.н. Азовски баталјон.   

„Слушнавме обвинувања за ѕверски напад на породилиште пред три дена. Нашата делегација даде докази дека тоа породилиште е окупирано од Азовскиот баталјон и дека ги исфрлиле бремените жени и работниците… Заклучоците сами извлечете ги. Јавноста низ дел од светот е изманипулирана“, рече Лавров пред да ги оцени реакциите за нападот како „патетични“.

„Не е првпат да видиме патетични негодувања во врска со таканаречените злосторства извршени од руската војска“, рече тој па  ги осуди западните медиуми дека се премногу „емотивни“ и не дозволуваат „објективен“ поглед на тековниот конфликт.

„Се обидуваме да привлечеме внимание на фактот дека Украина со години е антируска. Со кого сте вие, со Западот или со Русија?“, ја праша Лавров Украина. „Ќе излеземе од оваа криза, минавме низ многу кризи и секогаш сме излегувале. Ќе излеземе посилни од ова. Немаме илузии дека Западот е наш партнер. Сега знаеме дека може да бидеме предадени од секого и во секое време“, рече Лавров.

Шефот на дипломатијата го обвини и Западот дека и обезбедува оружје на Украина.

Тој рече: „Гледаме колку опасно се однесуваат нашите западни колеги, вклучително и во Европската унија и кршејќи ги сите нејзини таканаречени принципи и вредности, го поттикнува снабдувањето со смртоносно оружје за Украина“. (Според агенциите)