Средба на Мицкоски со претставник на Стејт департментот
На маргините на НАТО Самитот во Вашингтон премиерот Христијан Мицкоски оствари повеќе билатерални средби и разговори, соопштува прес-службата на владата.
Мицкоски се сретна со потсекретарот за политички прашања во американскиот Стејт департмент, Џон Бас. Соговорниците разговараа за стратешките интереси на државата, како и за интеграцијата и напредокот на регионот.
Мицкоски подвлекол дека борбата против организираниот криминал и корупција како и владеењето на правото се приоритети на новата Влада. Тој додал дека иднината на регионот е во тесна соработка на државите, и насоченост кон работите кои не обединуваат како и создавање на иднина која ќе донесе просперитет на сите.
Премиерот Мицкоски оствари средба и со претседателот на Чешка Петр Павел. Соговорниците разговараа за искористување на потенцијалите за економска и политичка соработка.
Претседателот на македонската влада Мицкоски истакна дека иднината на регионот е во полноправно членство во Европската унија и дека на тој план се направени премногу отстапки и откажувања кои не се вреднувани до крај и дека кочењето преку неразумните спорови мора да престане. Мицкоски оствари разговор и со премиерката на Естонија, Каја Калас со која разговараше за интензивирање на соработката и поддршка на македонските ЕУ интеграции.