Со субвенцинирање на плати досега вработени 1.346 лица, се најавува нов оглас

Над илјада работни места се поддржани мерката „Субвенционирање на плати“, за која компаниите покажаа исклучителен интерес, соопшти Министерствот за труд и социјална политика. 

Агенцијата за вработување досега распиша два јавни огласи за мерката, на почетокот на март и кон крајот на месец мај. Досега се потпишани договори со 1.042 компании за вработување на вкупно 1.346 лицa, се вели во соопштението. 

Од таму додаваат дека заинтересираноста на компаниите за отворање нови работни места со користење на мерката субвенционирање на плата ги надмина првично планираните средства и опфат на корисници. Затоа, Агенцијата за вработување ќе објави нов оглас.

Финансиската поддршка е така дизајнирана што поттикнува вработување на млади лица и се настојува да се постигне еднаква родова застапеност. Со овие два огласи, поддржани се вработувања на 663 лица до 29 годишна возраст и на 663 жени. Финансиската помош за новоотворените работни места досега изнесува 302.556.000 денари, велат од Министерството.

Кај субвенционирањето на плати поддршката може да биде 3, 6 или 12-месечна. Се субвенционира бруто плата од 19.000 денари по лице. Со најголемата поддршка, фирмата добива неповратни 228.000 денари за вработување на едно лице, кое работодавачот има обврска да го задржи на работа вкупно 30 месеци.