Словенија се повлекува од Евросонг?

Словенија, според сите извештаи, нема да учествува на Евросонг 2026, а словенечкиот јавен радиодифузен сервис РТВСЛО дури и нема да го емитува натпреварот, како што покажуваат најновите нацрти на Планот за продукција за следната година. Иако сè уште се чека формална потврда, бројни словенечки медиуми објавуваат дека таков исход е многу веројатен.

Според планот, Словенија нема да има ниту изведувач, ниту делегација, ниту телевизиско емитување, што важи и за Детскиот натпревар за песна на Евровизија.

Политички и финансиски причини
Главната причина за повлекувањето наводно е учеството на Израел. РТВСЛО и дел од словенечката јавност веруваат дека не можат да учествуваат додека Израел е дел од натпреварот, став што го имаат со месеци. Од друга страна, израелскиот радиодифузен сервис Кан тврди дека Евровизија останува културен настан на кој не треба да влијае политиката.

Втората причина е финансиска. Во нацрт-програмата за 2026 година се наведува дека обемот на забавната содржина ќе биде поскромен поради големите спортски настани кои бараат огромни инвестиции и максимален технички капацитет.

„2026 година ќе биде година на спортот. Врвот на годината ќе бидат Зимските олимписки игри во Милано и Кортина д’Ампецо помеѓу 6 и 22 февруари. Ова ќе биде најнапорниот и најобемниот проект на Спортската програма“, се наведува во нацрт-документот. Покрај Олимписките игри, тука се и Светското првенство во фудбал и традиционалните натпревари во Крањска Гора, Љубно и Планица.

Фокус на домашната музика
Наместо Евровизискиот натпревар, RTVSLO планира да ги пренасочи средствата и посилно да се фокусира на националната музика и културната продукција. Најавени се нови содржини инспирирани од фолклорот, музички формати за помладата публика, семејни забавни програми и документарци за историјата на словенечката телевизија.

И покрај сè, Словенија не се повлекува од Европската радиодифузна унија (EBU). Претставниците на RTV ќе продолжат да работат во комитети и работни групи, што значи дека ќе останат дел од системот, но без да учествуваат во неговиот најгледан проект.

Конечен одговор
Конечниот одговор може да стане појасен по Генералното собрание на EBU на 4-5 декември, кога ќе се дискутира за учеството на Израел и новите правила. Радиодифузерите ќе имаат рок до 10 декември да ја потврдат или повлечат својата одлука за учество на Евровизија 2026.

Евросонг, исто така, воведува промени во правилата за гласање и промоција по контроверзноста околу настапот на Израел на минатогодишниот натпревар. Обожавателите сега ќе можат да дадат 10 гласови наместо претходните 20, а гласовите на жирито повторно ќе се бројат во полуфиналето. Покрај тоа, организаторите ќе им забранат на натпреварувачите и радиодифузерите да учествуваат во промотивни кампањи водени од посредници, вклучително и влади, откако наводно минатата година една израелска владина агенција платила за реклами за да го охрабри гласањето за нејзин претставник.