Словачкиот премиер им се закани на медиумите кои биле „непријателски“ кон владата

Словачките новинари и меѓународните набљудувачи изразија тревога откако новиот премиер Роберт Фицо ги опиша водечките медиуми како непријателски и се закани дека ќе им го ограничи пристапот.

Фицо, кој ја презеде функцијата лидер на Словачка во октомври како дел од коалициската влада предводена од неговата популистичка партија Смер, оваа недела рече дека некои од најголемите медиуми во земјата не се добредојдени во неговата канцеларија.

„Најавив акции против непријателските медиуми – ТВ Маркиза, ‘Деник Н’, ‘СМЕ’ и порталот ‘Актуалит’ “, рече тој, тврдејќи дека тие „отворено објавуваат омраза и непријателство против Смер и со радост ги шират овие трендови“.

 „Решив да ја провериме нивната дозвола за влез и работа во владината канцеларија“, рече премиерот, додавајќи дека „до донесување на одлуката тие ќе бидат непожелни гости во владината канцеларија“.

Фицо претходно беше премиер од 2006 до 2010 година и повторно во периодот од 2012 до 2018 година, поднесувајќи оставка по убиството на Јан Куцијак, истражувачки новинар во „Актуалити“ и неговата свршеница Мартина Кушнирова.

Убиствата, кои предизвикаа политичка криза, ја ставија во центарот на вниманието слободата на печатот во регионот.

Сега повторно на власт, Фицо го критикуваше јавниот радиодифузен сервис во земјата и јасно стави до знаење дека не сака независни медиуми.

Неговите коментари предизвикаа загриженост во Братислава и во странство дека слободата на печатот на Словачка е нападната – и дека Фицо може да ја стави земјата на пат сличен на оној на соседна Унгарија.

„Фицо води лична војна со новинарите и ја злоупотребува државата за тоа“, рече Питер Барди, главен уредник на „Актуалити“.

Иако истакна дека сè уште не е јасно дали Фицо навистина ќе им забрани на медиумите да присуствуваат на прес-конференции, Барди во средата рече: „Ако тоа се случи, нема да ни дозволи да ги соочиме со практичните аспекти на политиката што ја прават“.

Тој додаде: „Но, она што е полошо е што вака ја продолжуваат својата кампања за дезинформација против одредени медиуми, хранејќи ја јавноста со идејата дека не можат да ни веруваат затоа што лажеме и сме непријателски настроени“.

Беата Балогова, главен уредник на весникот „СМЕ“, повтори некои од овие грижи, пишувајќи на Икс: „Ако Европската унија е сериозна во одбраната на сопствените вредности, треба да биде повеќе од загрижена за состојбата на слободата на печатот во Словачка“.

Меѓународните организации исто така изразија загриженост за реториката на Фицо.

Павол Салаи, шеф на бирото за ЕУ и Балкан во Репортери без граници (РСФ), рече: „Со дискриминација на одредени медиуми, Фицо дискриминира и дел од граѓаните; впрочем, публиката на четирите таргетирани медиуми претставува голема група граѓани.

РСФ ги осудува вербалните напади на владејачките партии, нивните обиди да го ограничат пристапот до информации и нивното доведување во прашање на независноста на јавниот радиодифузен сервис РТВС“.

Прогресивната претседателка на земјата, Зузана Чапутова, ја бранеше слободата на печатот. „Медиумите се дел од крвотокот на демократијата“, напиша таа на социјалните мрежи.

„Јас одбивам и не можам да поддржам поделба на делови од општеството на повеќе или помалку благородни, пријателски или непријателски.

Но, експертите исто така велат дека Словачка сѐ уште е во далеку посилна позиција од Унгарија кога станува збор за нејзината медиумска сцена.

Салаи рече: „Благодарение на нејзиниот плуралистички, динамичен и економски здрав медиумски пејзаж кој има корист од цврсти правни гаранции, слободата на печатот во Словачка е релативно силна“.

Тој истакна дека земјата е рангирана на 17-тото место на Светскиот индекс за слобода на печатот, во споредба со 72-тото место на Унгарија.

Сепак, тој повика на внимателност.

„Фицо не смее да го кочи тој напредок или да го загрозува напредокот постигнат во последните години“, рече тој. Го повикуваме да престане со непријателската реторика и дејствија во име на правото на информирање на сите граѓани“. (Гардијан)