Силјановска како претседателка: „Ова не е време за фалби, за триумфализам“

Откако Стево Пендаровски го призна поразот и им честита на победниците, на јавноста ѝ се обрати новата претседателка на државата, Гордана Силјановска-Давкова, која им се заблагодари на граѓаните за големата поддршка што ја доби на овие избори и самата се запраша: „Со што ја заслужив оваа чест?“

Таа им упати „најголеми честитки“ на граѓаните затоа што покажале голема отпорност да не подлегнат на притисоците да бојкотираат и да го дадат гласот за оној што сакаат.

Таа рече дека и покрај големата победа ова „не е време за поделби, за фалби, за триумфализам“ и најави дека ќе биде претседателка на сите граѓани, на сите етнички групи, дека како прва жена на оваа функција во Македонија ќе се опкружи со „жени како мене, со жени како Вацлав Хавел. Тоа за мене е реформски чекор“.

Таа рече дека за време на кампањата не кажувала дека е најдобриот избор, но е сигурна дека граѓаните го направија „вистинскиот избор“. Силјановска нагласи дека таа за време на кампањата го кажувала она што го мисли и дека гласовите не ги добила затоа што е националистка. „Наградата за оваа функција е огромна одговорност“, рече таа.

Силјановска нагласи дека ова е време да се „обидеме да си помагаме едни на други. Треба да се разбираме, да бараме поддршка. Ќе направм сѐ да ги бранам националните и државните интереси“.

Таа рече дека зборовите на Пендаровски во обраќањето пред неа оти било киднапирано избирачкото право на илјадници граѓани и на одреден начин биле принудени да не гласаат на претседателските избори – се „добра оценка“.

Според последните податоци од ДИК од 83,15 отсто од избирачките места Силјановска имаше добиено 450 илјади гласови, а Пендаровски 203 илјади.