Сиљановска Давкова прими делегација од „Рамбл“, „Кантор Фицџералд“ и Трамп корпорација
![](https://nezavisen.mk/wp-content/uploads/2024/07/силјановска.webp)
Претседателката Гордана Сиљановска Давкова денеска примила делегација предводена од Крис Павловски, основач и извршен директор на меѓународната компанија „Рамбл“, од Хауард Лутник, основач и извршен директор на американската финансиска корпорација „Кантор Фицџералд“ и од Девин Нунес, поранешен конгресмен на Калифорнија и извршен директор на Трамп корпорација за медиуми и технологија, соопштија од претседателскиот Кабинет.
На средбата, претседателката била информирана за потенцијалните можности за соработка со македонските институции, во контекст на претстојниот процес на дигитална трансформација на македонското општество и спроведување на дигиталните реформи.
Во таа насока, Сиљановска Давкова ги поздравила иницијативите за економска соработка и размена на експертско и корпоративно искуство со овие успешни компании и изразила благодарност за поддршката од македонската дијаспора за отворање нови можности и привлекување на странски инвестиции во земјава.
Претседателката Сиљановска Давкова порачала дека дигитализацијата е неопходна за брз економски раст и напредок и има позитивен ефект не само во функционирањето на државата, туку за сите општествени и развојни процеси, вклучително и во процесот на македонските евроинтеграции, како клучна област.
На средбата било истакнато дека реформите во дигиталниот сектор треба да бидат во функција на подобрување на квалитетот на животот на граѓаните и сервис прилагоден на нивните реални потреби