Сиљановска-Давкова ги посети повредените од пожарот во Кочани кои се лекуваат во Софија
Претседателката Гордана Сиљановска-Давкова денеска во Софија ги посети повредените од пожарот во Кочани, кои се лекуваат во болницата „Пирогов“.
За време на посетата, претседателката оствари средба со министерот за здравство, проф. д-р Силви Кирилов, заменик-директорот на болницата, проф. д-р Николај Габровски и раководителката на Одделот за изгореници и пластична хирургија, доц. д-р Маја Аргирова.
Во разговорот со нив, таа била информирана дека здравствената состојба на осумтемина македонски пациенти е стабилна, се наоѓаат под постојан надзор од страна на врвни, искусни лекари и дека процесот на закрепнување бележи напредок.
Во присуство на лекар Македонец, на претседателката и беше овозможен подолг разговор со најблиските роднини на македонските пациенти. Тие најпофално се изразија за болничкиот персонал и манифестираа радост за видно подобрената состојба на нивните најмили.
Претседателката изрази срдечна благодарност за бугарската навремена, стручна и несебична помош. Таа нагласи дека токму во мигови на голема болка и национална тага се препознаваат вистинските пријатели, потенцирајќи дека бугарската хуманост и солидарност ќе останат врежани во колективната меморија на македонскиот народ.
При посетата, таа се сретна со дел од бугарските медицински тимови коишто директно учествуваа во укажувањето на итна медицинска помош, изразувајќи им особена благодарност за нивната пожртвуваност, човечност и професионалност.
Упатувајќи благодарност и до Министерството за здравство на Република Бугарија за координираната и стручно водена интервенција, претседателката истакна дека нивната благородна мисија е вистинско олицетворение на медицинската етика, солидарноста и хуманоста. Овие вредности, според неа, ќе останат темел на заемна почит и искрено пријателство меѓу двата блиски народа, бугарскиот и македонскиот.
Во Бугарија вкупно се наоѓаат 14 пациенти, од кои девет се во болницата „Пирогов“, сите се екстубирани и оперирани, кај некои е извршена трансплантација на кожа. Една пациентка се лекува амбулантски со преврски.
Пациентите имаат психолошка поддршка и кај сите се продолжува со третман на изгорениците.
Тројца се хоспитализирани во Военомедицинскиот центар во Варна во добра општа состојба и во болницата „Св Ѓорѓи“ во Пловдив е хоспитализиран еден пациент.
Сиљановска-Давкова денеска и утре престојува во работна посета на Бугарија, каде што ќе учествува на состанокот на шефови на држави и влади на „Акаба Процес Балкан III“ во Софија.
Како што јави известувачот на МИА од Софија, посетата се реализира на покана на претседателот на Република Бугарија, Румен Радев и кралот на Хашемитското Кралство Јордан, Абдула Втори.
Македонската претседателка ќе говори на првата сесија од состанокот насловена „Идентификување и разбирање на заканите“.
За време на посетата, предвидени се и билатерални средби на претседателката Сиљановска-Давкова со шефот на бугарската држава Румен Радев и со кралот на Хашемитското Кралство Јордан, Абдула Втори.