Што ако Иран се повлече од Светското првенство? Ова е најреалното сценарио

Тензиите меѓу Иран, Израел и САД се прелеаја и во фудбалот.

Претседателот на Иранската фудбалска федерација, Мехди Таџ, се обрати до јавноста на државната телевизија во Техеран и отворено го доведе во прашање учеството на тимот на Светското првенство во 2026 година.

Иран веќе се квалификуваше за Светското првенство, но ситуацијата е дополнително чувствителна бидејќи сите три натпревари по групи се закажани да се играат на американска почва. Според распоредот, Иран треба да игра против Нов Зеланд во Лос Анџелес на 15 јуни, против Белгија на истиот стадион на 21 јуни, додека натпреварот со Египет е закажан за 26 јуни во Сиетл.

Постои и можност Иран и САД да се сретнат во првиот нокаут натпревар, во осминафиналето, ако двата тима завршат како второпласирани во своите групи. Таквото сценарио дополнително ја комплицира ситуацијата и претставува потенцијално многу чувствителен предизвик за ФИФА.

Зборувајќи за евентуалното учество на Светското првенство, Таџ рече: „Со оглед на тоа што се случи денес и нападот од страна на Соединетите Американски Држави, тешко е да се очекува Светското првенство со надеж, но одлуката за ова мора да ја донесат лидерите на спортот.“

Дополнително, шефот на иранскиот фудбал потврди дека домашното првенство е суспендирано до понатамошно известување. Одлуката директно влијае и на неколку странски фудбалери кои играат во иранската лига и бараат излез од Иран.

Целата ситуација покренува сериозни прашања за ФИФА, организаторот на Светското првенство во 2026 година, кое ќе се игра во Соединетите Американски Држави, Мексико и Канада. Доколку Иран конечно се повлече или биде спречен да присуствува, тоа би поставило преседан и би предизвикало нови политички и спортски тензии.

Веб-страницата „Фудбал мејтс дата“ ги разгледа можните сценарија во случај Иран да се повлече од Светското првенство. Тоа би создало хаос, но ова е најреалното сценарио.

Ирак беше најдобро пласираната екипа во азиските квалификации, но не обезбеди директно место и ќе мора да игра во меѓуконтиненталните плејоф натпревари на крајот на март. Таму ќе играат одлучувачки натпревар на неутрален терен против Боливија или Суринам, а победата ќе им обезбеди место на големиот турнир.

Доколку Ирак не успее да се квалификува на теренот, би било можно ФИФА да им додели покана – еден вид „вајлд карта“ – како замена за Иран.

Меѓутоа, доколку Ирачаните обезбедат место сами, следниот кандидат за испразнетото место би биле Обединетите Арапски Емирати, кои беа поразени од Ирак во петтото коло од квалификациите. ФИФА се соочува со толку чувствителна одлука што би можела да предизвика бројни реакции, а исходот би можел да има силно влијание врз азискиот фудбал.