Шолц и официјално кандидат на СПД за канцелар, екстремната АфД ја избра Вајдел
Германските социјалдемократи (СПД) денеска го потврдија канцеларот Олаф Шолц како главен кандидат на партијата за парламентарните избори во февруари.
Шолц беше номиниран за кандидат за канцелар од страна на извршната власт на партијата на крајот на ноември по бурна дебата, јави ДПА.
Пред ова, партијата две недели јавно дискутираше дали многу попопуларниот министер за одбрана Борис Писториус не треба да биде претставен како заменски кандидат.
По поразот на СДП на европските избори во јуни минатата година, позицијата на Шолц и партијата се соочија со уште еден тежок удар со падот на германската коалициска влада во ноември.
За разлика од неговата прва кандидатура за канцелар во 2021 година, Шолц овојпат не беше избран со тајно гласање.
Екстремно десничарската Алтернатива за Германија (АфД) денеска ја именуваше Алиса Вајдел за своја кандидатка за канцеларка на претстојните парламентарни избори.
Вајдел беше едногласно избрана за кандидатка за канцеларка на партиската конференција во Риеса, Саксонија, без друг кандидат, јави јавниот сервис БР 24.
Вајдел, која е лидерка на партијата и парламентарната група, вети дека Германија повторно ќе купува руски гас од гасоводот „Северен тек“ преку Балтичкото Море.