Шефицата на Гринпис на чело на климатската дипломатија на Германија

Назначувањето на шефицата на Гринпис, Џенифер Морган за германска претставничка за климата, означува нова врвна точка за промената на климатското движење во мејнстрим политиката. Но, со таа важност и моќ ќе дојде и компромис.

„Меѓународната климатска политика на Германија сега има лице“, рече министерката за надворешни работи Аналена Бербок на прес-конференција со Морган во средата во Берлин.

Морган ќе влезе во работата во конфликт со некои елементи на германската и политиката на ЕУ. Минатата недела таа ја критикуваше одлуката на ЕУ да ги класифицира гасот и нуклеарната енергија како зеленi според новата финансиска таксономија на блокот. Германија го поддржува вклучувањето на гасот – иако зелените политичари како Бербок се против.

Владата и официјално е за гасоводот „Северен тек 2“, против кој Гринпис протестираше и се бореше пред судовите токму во времето на Морган.

Запрашана на прес-конференцијата дали може да остане доследна на својот активизам, Морган одговори: „Наоѓам места каде што верувам дека можам да направам најголема разлика. Во овој историски момент, верувам дека е тука, во Министерството за надворешни работи“.

Опозицијата го критикуваше назначувањето на активист на висока функција, при што еден висок конзервативен политичар праша дали владата ќе ја покани Антифа – крајно левичарско политичко движење – во Министерството за внатрешни работи.

Додека го водеше Гринпис, Морган играше на двете страни. Таа го задржа пристапот до највисоките внатрешни коридори на климатската дипломатија додека сè уште беше шеф на организација која рутински се спротивставува на владите со кои се справуваше зад затворени врати.

Во последните денови од климатскиот самит COP26 во Глазгов минатата година, таа се здружи со кинескиот претставник за климата Шие Женхуа и со Франс Тимерманс од ЕУ – сега нејзините колеги.

„Морган има децениски доверливи врски со оние кои би се согласиле со неа и оние кои не се – нејзиниот интегритет е клучен за улогата“, рече Рејчел Кајт, декан на школата „Флечер“ на Универзитетот Тафтс.

Плановите на Бербок за амбициозна Klimaaußenpolitik, или климатска надворешна политика, се дел од пошироките напори на новата германска влада да го претвори намалувањето на емисиите во меѓуресорска работа. Во претходните коалиции, зелената политика слабееше главно во помалото министерство за животна средина.

„Министерката јасно стави до знаење дека федералната влада повеќе не ја гледа климатската политика изолирано, како прашање на техничка политика“, рече Морган, која живее во Берлин од 2003 година.

Тоа бара и поширока промена во Министерството за надворешни работи и германските амбасади, изјави Бербок за новинарите.

„Нема да има само еден амбасадор за климата – ќе ги претвориме сите 226 германски странски мисии во климатски амбасади во сите земји во светот“, рече Бербок, додавајќи: „Во 21 век, климатската политика е исто така геополитика. Затоа ѝ припаѓа на надворешната политика“.

Во раните денови на претседателствувањето на Бајден, многу познати луѓе од климатското движење на САД се најдоа со работни места во Белата куќа или други владини гранки. Со COP26 владата на Обединетото Кралство назначи мноштво зелени тинк-тенкери и активисти на владини места.

Во Чиле, новата влада ја назначи климатската научничка Маиса Рохас за нејзин министер за животна средина. И актуелната шпанска министерка за еколошка транзиција Тереза ​​Рибера и главниот дипломат на Франција на климатските разговори во Париз во 2015 година, Лоран Тубијана, се поранешни шефови на тинк-тенк со седиште во Париз, Институтот за одржлив развој и меѓународни односи.

Не секогаш успева. Назначувањето на зелениот активист Николас Уло од страна на францускиот претседател Емануел Макрон за министер за еколошка транзиција стана кисело бидејќи Уло стана незадоволен од бавноста на промените.

Морган, родена во САД, ќе ја започне работата какоспецијален пратеник на 1 март. Таа ќе стане државен секретар во Министерството на Бербок откако ќе биде одобрено нејзиното барање за германско државјанство. (Политико)