Села свика Централно собрание на Алијансата

06/02/2024 12:36
Фото: Б. Грданоски
 
Претседателот на Централното собрание на Алијанса за Албанците, Зијадин Села, денеска упати покана до членовите на ова партиско тело за присуство на седница која ќе се одржи во сабота во 13 часот во Ресорт „Буши“ во Скопје. Прва точка е извештај на претседателот на партијата, Арбен Таравари, во врска со политичките случувања и разговори во пресрет на парламентарните и претседателските избори.
 
Поканата до медиумите е испратена од официјалниот мејл на Алијанса за Албанците, поканата до членовите на Централното собрание е испратена и потпишана од организацискиот секретар на партијата Исен Шабани, а на документот за одлуката за свикување на состанокот и за дневниот ред стои потписот на претседателот на Централното собрание, Зијадин Села.
 
Првата точка по која ќе расправа Централното собрание е извештај на претседателот на партијата за политичките случувања во пресрет на претседателските и парламентарните избори, што значи дека претседателот на Централното собрание, Зијадин Села, инаку поранешен лидер на Алијанса за Албанците, го повикал актуелниот лидер, Арбен Таравари на состанокот. Kaко втора точка е наведено навраќање и дебата на одлуката на раководството на партијата во врска со излегувањето на партијата на изборите, а која е донесена во октомври минатата година, односно дебата за одлуката за самостоен настап на Алијанса за Албанците, нешто што и натаму го застапува Села и неговите приврзаници.
 
Дали Таравари ќе дојде на Централното собрание, имајќи предвид до кој степен се заостри нивната комуникација и дали лидерот смета дека веќе ги добил потписите на поддршка за опозициски настап наведувајќи дека има 80 потписи од 133-те членови на собранието, останува да се види.  Медиана Амети, член на партиското собрание во телевизиски настап рече дека нејзиниот потпис на поддршка на Таравари е фалсификуван и дека таа смета дека седница мора да се одржи.
 
Останува отворено и прашњето колку членови од 133-те на ова партиско тело ќе дојдат на состанокот. Села има можност со двотретинско мнозинство од присутните членови на Централното собрание, како што предвидува партискиот статут, да се донесе одлука за разрешување на Таравари од претстедателската функција. На прес-конференција одржана во саботата, Села изјави дека одговорност значи и разрешување на претседателот на партијата, но и дека ќе побара и одговорност од министрите. Се чини дека Села ја има поддршката од шест од осум пратеници и на еден од тројцата министри.

Како што е познато, Таравари деновиве соопшти дека Алијанса за Албанците ќе му се придружи на опозицискиот блок „Европски сојуз за промени“, што предизвика бура во партијата и длабок раскол. Во тек е пребројување на тие што се за опозициски настап со коалицирање со Европски сојуз за промени и тие што се за самостоен настап. 

Таравари смета дека веќе мнозинството членови на Централното собрание со онлајн добиени потписи му искажале поддршка, додека Села инсистира дека местото на одлуката според статутот мора да биде седница на Централното собрание.

Излегување на Алијансата за Албанците сама на избори според аналитичарот Џелал Незири е најлошата варијанта што би можела да ја избере партијата. „Позицијата на Алијанса пред овие избори е важна како позицијата на ДУИ после изборите во 2016 и во 2020 година. ДУИ беше во таа позиција – после изборите да одреди кој ќе ја состави владата. А, Алијанса ја има сега таа позиција – да одлучи кој ќе ја состави владата после изборите. Ако оди заедно како цела со ДУИ и СДСМ на избори, сто проценти сум сигурен дека таа коалиција ќе добиеше најмалку 61 пратеник. Оваа позиција на Алијанса ја направи центар на некои збиднувања, притисоци, лобирања, сугерирања и сè уште е на таа позиција“, рече Незири на Телма.

Поврзани содржини

Ле Риголер: Гаранции за членство нема, но има јасен пат преку уставните измени
Дончиќ: Она што ви го прават Грците и Бугарите на европскиот пат е европска срамота
Македонските и хрватските општини водени од социјалдемократите ќе соработуваат
Савески почна со скандал, со поддршка за име од „тевтерчето“, обвини СДСМ
Прес-конференција на лидерите на СДСМ и хрватската Социјалдемократска партија (во живо)
Oсомничениот убиец во Охрид пред седум години му се заканувал и на екс-премиерот Заев
Мицкоски: Идните политичари мора да се фокусираат на вештачката интелигенција и енергијата, романтичните идеи да останат во минатото
Македонија и САД на 7 април во Вашингтон ќе одржат стратешки дијалог

Најчитани