СДСМ: Само Мицкоски и Чак Норис можат за два дена власт да донесат нова инвестиција
Тажно е да се гледа како Мицкоски и ВМРО-ДПМНЕ по секоја цена сакаат да покажат резултат и не бираат средства за да ги насамарат граѓаните. Но, потценување на интелигенцијата е дека само за два дена Мицкоски поканил, привлекол и договорил било кој нов инвеститор. Ова веројатно го можат само Мицкоски и Чак Норис, истакнуваат во соопштението од СДСМ.
Таков последен пример, како што велат, е инвестицијата на компанијата EPSOTECH, која Мицкоски ја објави како свое големо достигнување.
„Добро е што ВМРО-ДПМНЕ ќе овозможи инвестициите донесени од СДСМ да се реализираат, бидејќи тоа е добро за државата и граѓаните. Но, сметаме дека е политички простотилук да се тврди дека Владата на СДСМ ништо не работела, а во исто време Мицкоски да не признае дека се фали со наши проекти. Јавноста треба да знае дека во моментов има шест нови инвестции кои се со завршени договори и спремни за работа. Единствена причина заради која не ги објави СДСМ е да не го наруши изборниот процес. За овие инвестиции се завршени сите процедури и го чекаат последниот филтер во Комисија за заштита на конкурентноста“, велат од опозициската партија.
Му порачуваат на ВМРО-ДПМНЕ наместо да продава магла и пропагaнда, да се фати за работа и да реализира барем нешто свое.
„Срамно и смешно е два дена по преземањето на власта да промовира инвестиции како свои во услови кога уште немаат ни седнато на фотељите“, дополнуваат од СДСМ.
Од ВМРО-ДПМНЕ возвратија дека ја разбираат „фрустрацијата на СДС и Венко Филипче кои се китат со перјата на оваа влада“.
-Нивното време заврши. За само две недели, две големи инвестиции. Инвестицијата од 500 милиони долари на Алказар Енерџи во ветерен парк е најголема во регионот. И инвестицијата на германско белгиската компанија Епсотех Аим во Петровец од 20 милиони евра. Се потврди по којзнае кој пат и дека за СДСМ само ВМРО-ДПМНЕ може да донесе нови инвестиции во државата, што зборува за недостатокот на елементарна работливост од страна на СДС кои 7 години здружно крадеа со ДУИ, па затоа за нив посветеноста на оваа влада е недостижна цел на која ѝ придаваат супер моќи“, стои во реакцијата.