СДСМ не придава значење на најавата на Мицкоски за прекин на комуникацијата

Со оглед на тоа дека Христијан Мицкоски во изминатиот период дијаметрално менува ставови во секоја изјава не гледаме потреба да придаваме преголемо значење, велат од партијата на власт СДСМ, откако претседателот на ВМРО-ДПМНЕ обзнани дека на седница на Извршниот комитет, донеле одлука да ги прекинат комуникациите со власта, освен ако се разговара за предвремени избори.

– Тоа е одлика на човек кој често менува став и нема основно чувство за државност.  Наместо да работи на интеграција, Христијан Мицкоски сака да се прикажува како експерт за изолација и блокади. Мицкоски има право да се изолира себеси, но нема право да ја изолира државата. Неговата штетна политика на одбивање дијалог и обиди за блокади е доказ дека е подготвен и да ја закочи државата, да биде изолирана, само затоа што нема капацитет и не знае да реши ниту еден проблем и предизвик – велат од СДСМ.

Тврдат дека СДСМ нема да дозволи земјата да изгуби нови 11 години во изолација, како што се случи тоа во времето на шефот на Мицкоски, Никола Груевски.

Заедно со коалициските партнери и со сите партии кои се за европска иднина во европскиот блок ќе продолжиме со одговорно и државничко однесување. Ќе направиме се за продолжување на европскиот пат на земјата, да ја внесеме Македонија во ЕУ и да ја релизираме стратешката цел, се додава во соопштението.