СДСМ ќе ги спасува граѓаните од дивиот капитализам на ВМРО-ДПМНЕ

СДСМ ќе победува кога ќе го промени однесувањето кон членството и цврсто ќе ги реафирмира социјалдемократските вредности, изјави претседателот на СДСМ Венко Филипче во интервју за „Фокус“.

Тој додава дека најавената нова модерна платформа е од клучно значење за подигање на партијата, но и дека мора да направи реорганизација и демократизација на партијата.  

– СДСМ ќе победува ако се насочи кон реалните проблеми на граѓаните во политичка програма која ќе значи унапредување на животот во секој сегмент и за секого. По ова треба да биде препознаен СДСМ. Да нуди конкретни решенија и ја доближи својата политичка реторика до граѓаните, рече претседателот на СДСМ Филипче. 

Според него, СДСМ мора да ја негува демократијата и слободата како единствена голема партија во моментов која има целосно демократска ориентација.

– СДСМ не смее да калкулира со национализмот и да води политики на манипулации на штета на напредокот. Такви партии имаме доволно, нагласи Филипче.

Тој додава дека СДСМ мора да им се обраќа на работниците и на ранливите групи за кои е направено навистина многу во изминатиот период.

– Овој пристап кон работниците, комбиниран со ефикасен модел за раст на економијата и поддршка на компаниите, ќе даде резултат за сите. И ова е политика на заштита на граѓаните која верувам дека ќе биде препознаена пред налетот на  дивиот капитализам кој го нуди ВМРО-ДПМНЕ, изјави претседателот на СДСМ Филипче.