Сања Божиновска тврди дека сега нема бугарски пасош, но не го оспорува потписот од изјавата за „бугарската самосвест“

Документот што денеска го објави бугарскиот медиум БГНЕС, на кој се гледа дека министерката за енергетика, Сања Божиновска, во 2004 наводно своерачно потпишала изјава дека има бугарска самосвест и бугарско потекло повторно ја зовре ситуацијата околу нејзиниот бугарски пасош. За тоа се расправаше и во Собранието за време на пратеничките прашања, а писмено реагираше и самата Божиновска.

Во соопштението испратено до МИА, таа вели дека сега поседува само македонско и чешко државјанство, но не демантира дека нејзиниот потпис стои во изјавата за „бугарската самосвест“.

Во соопштението испратено од Министерството за енергетика се наведува дека Божиновска на 14 септември минатата година побарала отпуст од бугарското државјанство. 

„За жал, одредени актери од Бугарија, на кои не им е во интерес градењето на добрососедски односи помеѓу Македонија и Бугарија со цел надминување на пречките за нашето членство во Европската унија, наместо култура на дијалог, ја злоупотребуваат ситуацијата. Државјанството кое го поседувала во минатото е земено од економски причини како што тоа го направиле многу македонски граѓани, а не како што некои актери сега сакаат да ја извртат вистината дека станува збор за национални причини“, се наведува во соопштението испратено до МИА.

Бугарски БГНЕС објави дека во октомври 2004 година Божиновска своерачно потпишала дека има бугарско потекло при апликацијата за бугарско државјанство. Бугарската агенција објави и документ за кој тврди дека е декларација потпишана од Божиновска.

Ова беше тема и на денешната собраниска седница посветена на пратенички прашања на кои премиерот Христијан Мицкоски рече дека Божиновска е поголема Македонка од сите во опозициските клупи.  

„Да биде Сања Божиновска дел од македонската влада е привилегија. Нејзините резултати во енергетиката се нешто кое може да го сонувате. Зборуваме за работи за кои јавноста не ја интересираат. За неа знае бизнис кремот од Украина до Шпанија и од Скандинавија до Атина. Измислуваме приказни кои немаат никаква врска ни со енергетиката, ни со минералните суровини. Тоа е исто како да зборуваме сега за тоа што вие дававте пасоши на белосветски криминалци. Сања Божиновска е многу поголема Македонка од вас сите заедно“, рече Мицкоски одговарајќи му на Оливер Спасовски од СДСМ.