Рускиот амбасадор благодарен што присуствувал на Пленумот на Левица
Сергеј Баздникин вели дека односите меѓу двете земји не се најдобри сега, но не по вина на Москва
![](https://nezavisen.mk/wp-content/uploads/2023/12/Сергеј-баздникин-и-Димитар-Апасиев.jpg)
Неколку дена по одржувањето на Вториот пленум на Левица, на која за лидер повторно беше избран Димитар Апасиев, објавена е благодарницата на рускиот амбасадор Сергеј Баздникин за честа што му била направена да присуствува на овој собир.
Баздникин и кинескиот амбасадор беа двајцата странски дипломатски претставници во земјава кои беа присутни на овој собир. Покрај нив имаше и други гости, меѓу кои и неколку европарламентарци. На двајцата амбасадори Апасиев им додели почесни статуетки кои претставуваат партиски симбол за пријателството.
Во писмото на Баздникин тој вели дека е благодарен на можноста да присуствува на Пленумот на Левица. Тој вели: „На партијата чии ставови се патриотски и посветени на сочувањето на достоинството на државата, македонскиот национален идентитет и македонскиот јазик. Ве обвинуваат и етикетираат дека сте проруската партија – тоа не е така. Вие сте исклучиво македонската партија и ова вистина е добро позната за сите.
Убеден сум дека сите присутни добро знаат и разбираат дека Русија никогаш не се мешаше и нема намера да се меша во внатрешните работи на вашата земја, со чиј народ сме врзани со вековни врски на пријателство и меѓусебно почитување, засилени со духовно и културно сродство и заеднички словенски корени“.
Баздникин во писмото нагласува дека односите меѓу двете земји минувале низ лошо време, а за тоа не била виновна Русија, но продолжуваат да контактираат со луѓе од различни области, меѓу кои и политиката.
„И покрај фактот дека сега билатералните односи меѓу нашите земји минуваат низ не најдоброто време – не на иницијатива на руската страна, туку како резултат на бројни непријателски чекори против неа – амбасадата продолжува да ги користи сите постоечки можности за поддржување на контакти во различни области, вклучително и политичка.
Како дел од овие напори, се разбира, се обидуваме да одржиме комуникација со оние кои се подготвени за конструктивна интеракција и за размена на мислења за тековни прашања. Ние – и јас лично – високо ги цениме отворените контакти со членови на партијата, ставот што го заземаат нејзините членови, вклучително и јавно.
Вашите активности – особено во сегашните услови – ги сметам за одраз на вистински патриотски чувства традиционално својствени на македонскиот народ“, вели рускиот амбасадор.