„Росатом“ сака да продаде 49 проценти од акциите во турската нуклеарна централа „Акују“

Москва – Руската државна нуклеарна корпорација „Росатом“ е во преговори за продажба на 49 проценти од акциите во нуклеарната централа „Акују“, вредна 25 милијарди долари, што ја гради во Турција.

Во тек се преговори со турски и странски инвеститори. – Колку се приближуваме до завршувањето на првата единица, толку повеќе инвеститори почнуваат да доаѓаат, изјави за „Блумберг“ претседател на одборот на директори на подружницата на „Росатом“, одговорен за нуклеарната централа „Акују“, Антон Дедусенко.

Претходниот обид за продажба на акции во 2018 година не успеа откако конзорциум од турски компании се повлече поради неможност за договор за комерцијални услови.

Првата единица од централата од 4,8 гигавати, која ќе биде првата нуклеарна централа во Турција, моментално се тестира и се очекува да започне со снабдување со електрична енергија во 2026 година, наведе Дедусенко.

Проектот е попречен поради проблеми со финансирањето, бидејќи странските банки се плашат од санкциите на САД, принудувајќи ги Турција и Русија да бараат алтернативни начини за плаќање на изградбата, вклучително и преку природен гас.