Регистрирана првата странска компанија за целите на ДДВ преку даночен застапник

Во Управата за јавни приходи – Регионалната Дирекција Скопје денеска е извршена регистрација на првиот даночен застапник на странска компанија која нема свое седиште, поддружница или претставништо, а врши промет на добра и услуги што се предмет на одданочување со ДДВ во земјата.

Согласно со последните измени на Законот за данок на додадена вредност, соопштија денеска од УЈП, странските лица кои имаат обврска да се регистрираат за цели на ДДВ во земјата, се обврзани да назначат даночен застапник.

– Овој даночен застапник ќе биде овластен застапник пред даночнот орган и во име и сметка на странската компанија  ќе го пресметува данокот, ќе поднесува даночна пријава, ќе го плаќа данокот односно камата во случај на задоцнето плаќање на данокот и ќе води сметководствена евиденција. Согласно Законот за ДДВ, даночниот застапник исто така солидарно ќе гарантира за данокот на додадена вредност кој го должи странското лице регистрирано за цели на ДДВ, се појаснува во соопштението од УЈП.

Во оваа насока, се додава, бил и состанокот што директорката на Управата за јавни приходи, Елена Петрова, вчера го одржала со потенцијални даночни застапници на тема имплементација на членот 9-б од Законот за данокот на додадена вредност (даночен застапник за целите на данокот на додадена вредност).

Директорката и потенцијалните даночни застапници, заедно со претставници од Управата за јавни приходи и Министерството за финансии, се наведува во соопштението, разговарале за отворените прашања и за административните чекори во регистрирањето странските лица како ДДВ обврзници и исполнување на нивните обврски за плаќање ДДВ во земјата.

Директорката Петрова укажала дека Управата за јавни приходи ќе обезбеди непречено одвивање на процесот на регистрирање и оптимизирање на истиот со цел обезбедување на правна сигурност како за странските лица така и за даночните застапници во земјата.

На овој начин како што појаснила Петрова, ќе се превенираат потенцијални случаи на даночни прекршоци, ќе се обезбеди правилно спроведување нa законите и регулативите, што пак од друга страна ќе резултираат со подобро управување на фискалните ресурси и создавање на фер третман на сите учесници на пазарот.

– На состанокот сите се согласија дека е најважно што побргу да започне регистрацијата и собирањето на ДДВ од странските лица кои вршат промет на добра и услуги во земјата, бидејќи со истото се обезбедува и правичност кон домашните даночни обврзници, како и полнење на буџетот со дополнителни приходи од ДДВ. Во оваа насока, УЈП во следните неколку денови ќе започне со комуникација со странските даночни обврзници кои вршат промет во земјата и треба да се регистрираат за ДДВ преку даночни застапници, се подвлекува во соопштението од УЈП.