Радев се потсмева со ЕУ, бара од Брисел да се почитувале човекови права во Македонија

Радев барал од Вархеи европските институции да се ангажирале на почитување на правата на „120.000 бугарски државјани во Република Северна Македонија“

Бугарија очекува ефективни дејствија од институциите на Европската Унија за валоризирање на вредностите на демократијата и почитувањето на човековите права во Република Северна Македонија. Ова го изјави претседателот на Бугарија Румен Радев денеска за време на средбата со еврокомесарот за соседство и проширување Оливер Вархеи, соопшти прес-службата на бугарскиот претседател.

Радев на средбата со Вархеји истакнал дека декларациите и ветувањата во дијалогот со Република Северна Македонија повеќе не функционираат и Бугарија очекува јасни правно обврзувачки одлуки што ќе доведат до одржливи и неповратни резултати, јави дописникот на МИА од Софија.

Според Радев, ова ќе го забрза процесот на европска интеграција за Република Северна Македонија. Бугарскиот претседател го потсетил Вархеји дека Договорот за пријателство, добрососедство и соработка со Република Северна Македонија потпишан во 2017 година не се спроведува и Скопје, според Радев, сè уште не го решил проблемот со говорот на омраза и всадување лажна слика за Бугарија во учебници, музеи и споменици, како и во однос на правата на граѓаните кои отворено ја изразуваат својата бугарска самосвест.

Претседателот на Бугарија Радев за време на разговорот со еврокомесарот Вархеји истакнал дека „120.000 бугарски државјани во Република Северна Македонија се државјани на Европската Унија, и Бугарија се потпира на поддршката на европските институции за ефективно почитување на нивните права“.

Напредокот во процесот на европска интеграција на земјите од Западен Балкан исто така беше во фокусот на разговорот меѓу Румен Радев и Оливер Вархеи.

„Бугарија е најзаинтересирана да ги види своите соседи во Европската унија, но за тоа е потребно целосно исполнување на Копенхашките критериуми за членство на Република Северна Македонија, особено почитување на човековите права и принципите на добрососедство, кои се основа на европската соработка“, нагласил бугарскиот претседател.

Заедничкиот став беше дека во процесот на европска интеграција на земјите од Западен Балкан и решавање на спорните прашања, најважен е директниот и отворен дијалог.

Истите работи му ги кажал на Вархеи и службениот министер за надворешни работи Светлан Стоев. Според него, Софија мора да да ја почитува декларацијата на Собранието за Македонија и дека експерстките консултации во последните неколку месеци биле на иницијатива  на Бугарија.

И Стоев изјавил дека Бугарија е многу заинтересирана за европската перспектива на земјите од Западен Балкан, вклучително и Македонија. „Водени од оваа позиција, вложивме сериозни напори за одржување на отворен и полноправен дијалог со нашите соседи и враќање на довербата во односите меѓу нас“, рекол Стоев и нагласил дека очекува „Македонија да покаже политичка волја за надминување на разликите“.

По Софија, еврокомесарот Оливер Вархеји ќе ја посети Македонија, каде што ќе се сретне со нејзиниот државен врв.