Путин: Ако не се повлечи украинската армија, Русија со сила ќе го заземе Донбас
Рускиот претседател Владимир Путин денеска изјави дека Русија „со сила ќе го заземе целиот украински регион Донбас, ако не се повлече украинската армија“.
– Или со сила ќе ја заземе територијата или украинската армија ќе се повлече, изјави Путин во интервју за индиската телевизија „Индија тудеј“ (India Today).
Претходно, Украина соопшти дека „нема да и подари на Русија дел од својата територија“, а претседателот Володимир Зеленски додаде оти „Москва не треба да биде наградена за војната што ја почна“.
Русија моментално контролира над 19 проценти од територијата на Украина, а во преговорите со САД за завршувањето на војната, Москва нагласи дека сака да го контролира целиот Донбас, дел од Украина кој се состои од два региона, Доњецк и Луганск.
Путин пред два дена разговараше и со претставниците на американскиот претседател Доналд Трамп, Стив Виткоф и Џаред Кушнер, и изјави дека Русија „прифатила некои американски предлози“ и оти продолжуваат преговорите.
Кремљ во 2022 година објави дека украинските територии Луганск, Доњецк, Херсон и Запорожје ѝ припаѓаат на Русија.