Публиката во „Ројал фестивал хол“ во Лондон првпат стана да игра и тоа на настапот на Џијан Емин

Нашиот маестро Џијан Емин и славниот диџеј Дерик Меј ја кренаа публиката на нозе во престижната „Ројал фестивал хол“ во Лондон. Ова не е чест случај кога лондонската публика станува на нозе да игра.

Џијан Емин, заедно со оркестарот „Сити оф Лондон симфони“, настапи како диригент заедно со Дерик Меј, чија успешна соработка трае годиниве наназад на меѓународните сцени. На концертот во Лондон беа изведени композиции на Меј и на Емин, за чија оркестрација се погрижи токму македонскиот истакнат уметник.

– Концертот беше дел од „Мелтдаун фестивал“ чиј куратор е познатиот продуцент Најл Роџерс. Настанот помина прекрасно. Оркестарот беше фантастичен, како и маестралните Сем Лик на соло-пијано и Елоиз Вернер, која настапи како соло-вокал. Звукот, пак, во концертната сала беше извонреден. По првпат во историјата на ‘Ројал фествал хол’ се случи еуфорија и публиката стана да танцува. Настапот помина со овации, нè викнаа двапати на бис, а критиките по концертот беа мошне позитивни – вели Џијан Емин.
Додава дека многу е среќен што имаше ваква можност, да одржи концерт во еден таков престижен простор во кој настапуваат светски имиња, диригенти, оркестри, солисти.
– Меѓу публиката имаше многу ѕвезди кои јас како дете, на пример, сум ги гледал на ТВ и тоа даде дополнително задоволство. Едноставно, ова беше еден од најважните концерти кои досега сум ги одржал – вели македонскиот уметник.