Продажбата на доларот станува меур што може да пукне, предупредуваат банкари
Стратезите на банката HSBC предупредуваат дека остриот пад на американскиот долар сè повеќе личи на „анти-меур“ – инвестициска еуфорија што, како и сите други, пукнува во одреден момент. Иако слабеењето на доларот продолжува, знаците на пресврт стануваат сè поизразени.
Континуираната продажба на доларот сè повеќе потсетува на меур – и како и сите меурчиња, и овој на крајот ќе пукне, според стратезите на британската банка HSBC Holdings Plc.
Трговците се чини дека се опседнати со остриот пад на доларот оваа година и се склони да го проектираат тој тренд во иднина, според белешка потпишана од аналитичарите предводени од Пол Макел. Ова, предупредуваат тие, покажува модели на однесување слични на оние за време на пазарните меурчиња.
„Не помина многу од моментот кога имаше очигледен меур на силен долар, но сега сме сведоци на спротивното – еден вид „анти-меур““, се наведува во анализата. „Постојат карактеристики на меур, што е предупредувачки знак дека дното на вредноста на доларот можеби не е далеку.“
Индексот на доларот на „Блумберг“ (Bloomberg Dollar Spot Index) падна за повеќе од 8% од почетокот на годината, откако агресивните американски царини и хаотичното спроведување на политиките ја доведоа во прашање стабилноста на светската резервна валута. HSBC очекува доларот да остане слаб некое време, но предупредува дека аргументите за понатамошен пад станаа премногу еднострани.
Иако неизвесноста околу економската политика на САД го поткопа статусот на доларот како безбедно засолниште и дополнително ја поттикна глобалната „де-доларизација“, аналитичарите веруваат дека причините за понатамошна продажба веќе не се толку силни како кога претседателот Доналд Трамп објави широк спектар на царини во април.
Враќањето кон потрадиционална рамка во која доларот е усогласен со приносите од американските обврзници би можело да сигнализира крај на неговиот пад, според HSBC. Сличен модел сега почнува да се појавува помеѓу американските акции и приносите, што исто така би можело да најави пресврт.
Од друга страна, падот на доларот би можел повторно да се забрза ако политичката неизвесност во Соединетите Држави се зголеми или глобалната економија влезе во фаза на забрзан раст. Иако ниту едното ниту другото не е основно сценарио на HSBC, „ризиците се реални“, предупредуваат тие. Потенцијални предизвикувачи би можеле да бидат замената на претседателот на Федералните резерви, Џером Пауел, или континуираната доминација на еврото.
„Додека ги разгледуваме можните сценарија за пад на доларот, мора да ги имаме предвид и факторите што би можеле да сигнализираат крај на неговата слабост“, заклучува тимот предводен од Макел. „Според наше мислење, се формира „антидоларски меур“. Иако сè уште не е подготвен да пукне – меурчињата секогаш пукнат.“