Претставата „Експеримент“ вечерва во МКЦ

Tеатарската претстава „Експеримент“, по текст и режија на Јане Спасиќ, а во продукција на здружението „Артопија“ од Скопје вечерва во 21 часот ќе се одигра во Младинскиот културен центар.

Главна инспирација за претставата е книгата „The Lucifer Effect“ на социјалниот психолог Филип Зимбардо, кој во своето дело ги анализира начините и методите преку кои системот и ситуацијата влијае на дехуманизацијата и деиндивидуализацијата на индивидуата, притоа постепено насочувајќи ја индивидуата да извршува злосторства „во име“ на системот.
Група на фантазмагорични суштества, буфони, ги поседуваат сите искуства и мемории на човештвото. Нивна единствена цел е да го набљудуваат човекот, да бидат негово „критичко огледало“ и еднаш годишно да „мигрираат“ во реалниот свет за да му укажат на грешките. Доаѓа денот од годината кога треба да се „мигрираат“ во реалниот свет и повторно да огласат пред луѓето, но по кратко согледување на ситуацијата буфоните констатираат дека човекот постојано ги повторува истите грешки и нема капацитет да согледа дека тоа го води кон самоуништување. Решаваат да го откажат доаѓањето во реалниот свет бидејќи им се чини бесцелно, но сепак, еден од буфоните не сака да се откаже од човекот, наоѓа уникатен мемориум и успева да ги убеди дека можеби треба да се огласат за последен пат…

Играат: Бојан Кирковски, Ненад Митевски, Мартин Јорданоски, Симона Спировска Костовска, Матеја Јанковска, Марија Јанчевска, Михаел Стојановски. Сценографијата е на Кирил Василев, а костимографијата на Бранкица Јорданоска. Монтажата на видеоматерјалите се на Горјан Атанасов, а дизајнот на плакатот е на Кристина Горовска. Технички координатор е Кирил Мечалов, а продуценти се Филип Николовски, Наташа Петровиќ и Радослав Гогушевски.

Билетите може да се набават на билетарницата во МКЦ и онлајн тука.