Почина Софи Кинсела, авторка на еден од најчитаните романтични серијали
Нејзините книги се продадени во повеќе од 50 милиони примероци, објавени се во повеќе од 60 земји и преведени на повеќе од 40 јазици
Една од најчитаните авторки на современа популарна фикција и креаторка на серијалот романи за шопингохоличарката Беки Блумвуд, почина на 55-годишна возраст. Од 2022 година, таа се бореше со агресивен облик на рак на мозокот.
Британската писателка Софи Кинсела, авторка на мегапопуларната серија романи „Шопингохоличарка“, почина на 55-годишна возраст, објави нејзиното семејство.
„Со скршено срце објавуваме дека нашата сакана Софи (исто така позната како Меди и Мама) почина утрово. Таа ги помина последните денови во топлина, со семејството и музика, Божиќ и радост“, се вели во пораката објавена на нејзиниот Инстаграм профил.
View this post on Instagram
Софи Кинсела, чие вистинско име е Мадлен Софи Викам, е една од најчитаните современи авторки на популарна фикција: нејзините книги се продадени во повеќе од 50 милиони примероци, објавени се во повеќе од 60 земји и преведени на повеќе од 40 јазици. Таа е најпозната по нејзината серијалот за Беки Блумвуд, кој започна со романот „Тајните соништа на една шопингхоличарка“, кој подоцна прерасна во осум книги. Првите два романа беа адаптирани и во истоимениот хит-филм од 2009 година, во кој глуми Исла Фишер.
Писателската кариера ја започна под псевдонимот Мадлен Викам. Својот прв роман, „Тенис забава“, го објави на 24-годишна возраст, додека работеше како финансиски новинар. Книгата беше критички призната и стана меѓу десетте бестселери, по што следеа уште шест романи под тоа име. Пет години подоцна, под псевдонимот Софи Кинсела, таа започна кариера што ќе ја обележи како една од клучните писателки на романтична комедија. Во 2022 година, ѝ беше дијагностицирана агресивна форма на рак на мозокот.
Покрај серијата „Шопахоличарка“, таа напиша и голем број други бестселери, вклучувајќи ги „Можеш ли да чуваш тајна?“ и „Совршена недомаќинка“, како и роман за млади возрасни и четири детски книги. Нејзиното најново дело, новелата „Какво е чувството?“, објавена во октомври 2024 година, е интимна, хумористична и трогателна приказна за справување со дијагнозата на рак, напишана по операцијата. Книгата е прогласена за едно од нејзините најлични и најсложени дела.
Нејзиниот издавач забележа дека Софи Кинсела „го дефинирала и воздигнала жанрот на романтична комедија, исполнувајќи го со проблеми од реалниот свет, мешавина од хумор, емоционална длабочина и социјален увид“, додавајќи дека нејзиниот препознатлив глас ги освоил читателите од различни генерации низ целиот свет.