Почина Рик Дејвис, еден од најпрепознатливите рок-вокали и фронтмен на легендарните Супертрамп 

Рик Дејвис, основачот, главниот пејач и текстописец на култниот прог-рок бенд Супертрамп (Supertramp), почина во сабота, 6 септември, на 81-годишна возраст по десетгодишна борба со ракот (мултиплекс миелом, рак на крвта). Со него замина еден од најпрепознатливите гласови на британскиот рок што ги обележа генерациите.

„Рик Дејвис, основачот, главниот пејач и текстописец на Supertramp, почина во сабота, 6 септември, на 81-годишна возраст по повеќе од 10-годишна борба со ракот“, објави бендот во официјално соопштение. „Роден во Свиндон, Англија во 1944 година, љубовта на Рик кон музиката започна како дете слушајќи ја песната „Drummin’ Man“ на Џин Крупа, која прерасна во доживотна страст кон џезот, блузот и рокенролот.“

Дејвис беше човек кој ја препозна моќта на комбинацијата. Неговата соработка со Роџер Хоџсон создаде хитови кои сè уште се пуштаат на радио станиците низ целиот свет денес. „Како коавтор, заедно со партнерот Роџер Хоџсон, тој беше гласот и клавијатуристот зад најпознатите песни на Supertramp, оставајќи неизбришлив белег во историјата на рок музиката“, се наведува во официјалното соопштение. „Неговите душевни вокали и непогрешлив допир со Wurlitzer станаа срцето на звукот на бендот.“

Патувањето до славата започна во 1969 година со формирањето на Supertramp, именуван по книга од велшкиот автор Вилијам Хенри Дејвис. Првите албуми поминаа незабележано, но вистинскиот пробив се случи во 1974 година со албумот „Crime of the Century“. Дејвис продолжи да ги пишува најсилните песни на бендот, вклучувајќи ги „Goodbye Stranger“ и „Cannonball“. „Breakfast in America“, шестиот албум на бендот, постигна четирикратен платински статус и освои две Греми награди.

И покрај нивниот успех, Хоџсон го напушти бендот во 1983 година. Дејвис продолжи да ги води Supertramp до нивниот последен распад во 2015 година поради здравствени проблеми.

„Надвор од сцената, Рик беше познат по својата топлина, отпорност и посветеност кон својата сопруга Сју, со која беа неразделни повеќе од пет децении“, се вели во соопштението. „Откако се соочи со сериозни здравствени проблеми што го спречија да продолжи со турнејата со Supertramp, тој уживаше настапувајќи со своите пријатели од родниот град како Ricky and the Rockets.“

„Музиката и наследството на Рик продолжуваат да инспирираат многумина и се доказ за фактот дека одличните песни никогаш не умираат, тие живеат“, се заклучува во официјалното соопштение на групата.

Со смртта на Рик Дејвис, музичкиот свет го загуби еден од своите најдобри звучни архитекти, човек кој сфати дека најдобрата прогресивна музика е онаа што се движи кон срцето на слушателот.