(Видео) Патот Битола-Прилеп потопен од излеани неисчистени канали, возачите револтирани
БИТОЛА – Под вода е патот Битола-Прилеп на потегот од Тополчани до таблата за село Витолише, реагираат граѓани на Битола кои утрово патуваат за Скопје.
Според Мерита Исмаили, советник во Општина Битола, патот е под вода и тоа на некои позиции повеќе од половина метар а на некои места има вода и до еден метар и сообраќајот се одвива отежнато. Под вода се и дрвјата покрај патот и не се гледа до каде е асфалтот. Возилата се движат со 20 километри на час.
„Патот е многу лош, излеана е вода на самиот коловоз се движиме многу бавно, вака е од Тополчани на кај Скопје. Од кога тргнавме од Битола до Прилеп патувавме еден и пол час. Претпоставуваме дека е од неисчистени канали. Друго нема“, вели Исмаили.
Во тек е реконструкција на патот Битола-Прилеп, па сообраќајот во еден дел се одвива по стариот пат. Возачите од Битола до Тополчани одат по магистралниот пат, потоа на таа точка се исклучуваат и се приклучуваат на стариот регионален пат Битола-Прилеп.
Вака е до таблата за село Витолиште, мариовско, а потоа патувањето се продолжува по магистралниот пат.
Од Центарот за управување со кризи соопштија дека – Преку број за итни повици 112 добиена е информација дека новиот пат Прилеп-Битола е пренасочен на стариот пат поради голем излив на вода кај с.Ново Лагово поточно кај Воденицата. (А.Б.)
Видеата се на Мерита Исмаили