Ова девојче нема ни 3 години, а стана новата „жива божица“ во Непал
Двегодишно девојче е избрано за нова „жива божица“ на Непал, а членовите на семејството ја однесоа од нејзиниот дом до палатата на храмот, во вторникот, за време на најважниот хиндуистички фестивал во земјата.
Арјатара Шакја, стара две години и осум месеци, е новата Кумари, или „девица божица“, и таа ја наследува својата претходничка, која, според традицијата, се смета за обичен смртник по влегувањето во пубертет, пишува Си-ен-ен.
Која е Кумари?
Кумарите се избираат од кланот Шакја, кој припаѓа на заедницата Невар, домородна во долината Катманду. Тие се почитувани и од хиндусите и од будистите во оваа претежно хиндуистичка нација. Девојчињата се избираат на возраст меѓу две и четири години и мора да исполнуваат строги критериуми – мора да имаат беспрекорна кожа, коса, очи и заби и не смеат да се плашат од темнина.
За време на фестивалот Индра Џатра претходно овој месец, поранешна Кумари се возеше во кочија влечена од верници. Кумарата секогаш носи црвена облека, косата ѝ е врзана во пунџа и има насликано „трето око“ на челото.
Во вторникот се одбележа осмиот ден од Дашаин, 15-дневна прослава на победата на доброто над злото, а канцелариите и училиштата беа затворени за луѓето да можат да слават со своите семејства. Семејството, пријателите и верниците ја придружуваа новата Кумари низ улиците на Катманду пред да влезе во палатата на храмот, која ќе биде нејзин дом во следните неколку години.
Знак на почит и татковска гордост
Верниците се редеа за да ги допрат нозете на девојчето со челата, највисокиот знак на почит меѓу Хиндусите во хималајската нација, и ѝ нудеа цвеќе и пари.
Новата Кумари утре ќе ги благослови верниците, вклучувајќи го и претседателот.
„Вчера таа беше само моја ќерка, но денес е божица“, рече нејзиниот татко, Ананта Шакја. Тој додаде дека имало знаци дека таа ќе стане божица уште пред да се роди.
„Мојата сопруга сонуваше за време на бременоста дека е божица и знаевме дека ќе биде некоја многу посебна“, рече тој.
Живот по божеството
Поранешната Кумари, Тришна Шакја, сега 11-годишна, ја напушти палатата низ задниот влез во паланкин што го носеа нејзиното семејство и поддржувачи. Таа стана „жива божица“ во 2017 година.
Фамилиите што ги исполнуваат условите од кланот Шакја се натпреваруваат за да бидат избрани токму нивните ќерки, бидејќи семејството Кумари добива висока позиција во општеството. Сепак, Кумарите живеат осамен живот. Тие имаат малку пријатели со кои можат да си играат и им е дозволено да излегуваат само неколку пати годишно за време на фестивалите.
Предизвици на адаптацијата и модернизацијата
Поранешните Кумари се соочуваат со тешкотии при прилагодувањето на нормалниот живот, учењето да работат домашни работи и посетувањето редовни училишта. Според непалскиот фолклор, мажите што ќе се оженат со поранешни Кумари ќе умрат млади, оставајќи многу девојки немажени.
Сепак, во последниве години, традицијата се менува. На Кумарите сега им е дозволено да се образуваат во палатата на храмот со помош на приватни тутори, па дури и да имаат телевизор. Владата, исто така, им плаќа на пензионираните Кумари месечна пензија од околу 110 долари, што е малку над минималната плата.