Орбан: Преговори со Украина не може да има затоа што не знаеме која е нејзината територија

Унгарскиот премиер Виктор Орбан во петокот фрли сомнеж за можноста Европската унија да започне преговори во скоро време за Украина да се приклучи на блокот, велејќи дека е нереално да се започне процесот на пристап со земја која е во војна.

Говорејќи за државното радио, Орбан истакна дека е потребно едногласност меѓу 27-те земји-членки на ЕУ за прием на нова земја во блокот. Во случајот со Унгарија, рече тој, парламентот ќе треба да ѝ даде зелено светло на Украина, која има амбиции да се приклучи на ЕУ во рок од две години.

„Кога сум во парламентот, не чувствувам непремостлива желба унгарскиот парламент да гласа за членство на Украина во Европската унија во рок од две години. Затоа би бил внимателен со овие амбициозни планови“, рече Орбан.

Украина официјално доби статус на кандидат за ЕУ минатата година – невообичаено брза одлука за ЕУ и нејзиниот бавен пристап кон проширувањето, поттикнат од целосната инвазија на Русија. Водачите на ЕУ се очекува да одлучат дали да ги отворат пристапните преговори со Украина за време на самитот во декември.

Во петокот, Орбан рече дека ЕУ „ќе мора да одговори на многу долги и тешки прашања сè додека не дојдеме до точка каде што можеме дури и да одлучиме дали да започнеме преговори“.

„Кога ќе разговараме за иднината на Украина во Брисел наесен, нема да можеме да го избегнеме прашањето дали можеме сериозно да размислуваме за членството на таква земја“, рече тој.

„Дали можеме да започнеме преговори со земја која е во територијална војна? Не ја знаеме големината на територијата на оваа земја бидејќи сè уште е во војна, а не знаеме колку е нејзиното население, бидејќи тие бегаат… Да се прими земја без да се знаат нејзините параметри би било без преседан“, додаде тој.

Во понеделникот, Орбан му рече на унгарскиот парламент дека неговата влада „нема да ја поддржи Украина за ниту едно меѓународно прашање“ додека не се обноват јазичните права на унгарското малцинство во западна Украина.