Орбан исвиркан во Тбилиси

Унгарскиот премиер Виктор Орбан за време на посетата на Тбилиси, изјави дека изборите во Грузија, на кои победи владејачката партија, беа слободни и демократски. Сепак, тој беше исвиркан од демонстрантите во Тбилиси поради поддршка на режимот.

– Ја прочитав оценката на меѓународните организации и гледам дека никој не се осмелува да оспори дека изборите биле фер и демократски. И покрај сите критики, никој не се осмели да оди толку далеку – рече Орбан на конференцијата за новинарите во главниот град на Грузија.

Во неделата, набљудувачките мисии забележаа голем број неправилности, вклучувајќи ја и мисијата на Организацијата за безбедност и соработка во Европа (ОБСЕ).Групите рекоа дека наводните нерегуларности, вклучително и изборна измама, поткуп, заплашување гласачи и насилство во близина на избирачките места, можеби влијаеле на исходот, но не ги нарекоа изборите нефер.

Прозападните Грузијци ги прикажаа изборите како избор помеѓу владејачката партија која ги зајакна врските со Русија и опозицијата која се обидува да ја забрза интеграцијата со Европа.

Унгарија, која моментално претседава со ЕУ, ги налути другите членки на Унијата и НАТО алијансата со тоа што избра да одржува блиски врски со Русија и покрај нејзината инвазија на Украина во 2022 година и што ја посети Грузија како знак за поддршка на победата на проруската партија Грузиски сон.

– Ја критикуваме прераната посета на премиерот Орбан на Грузија. Тој не зборува во име на ЕУ – се вели во заедничката изјава на група од 13 министри за надворешни работи од земјите членки на ЕУ.

ЕУ и САД ја критикуваа грузиската владејачка партија Грузиски сон за некои од нејзините политики. Партијата создаде силни врски со Русија, иако тврди дека целосно го поддржува влезот на земјата во Европската унија. Орбан рече дека Грузија е на пат кон членство во Унијата, додавајќи дека резултатот од изборите е „проевропски избор“.Орбан изјави дека изборите во Грузија, на кои победи владејачката партија „Грузиски сон“ биле слободни и демократски и оцени дека владата на таа партија не дозволила Грузија да се претвори во „друга Украина“.

– Грузискиот народ донесе правилна одлука на изборите – во корист на мирот, бидејќи владата не сакаше да ја вовлече својата земја во бесмислената војна што се води во Украина. Сакам да ви честитам што во контекст на желбата за европска интеграција не дозволивте вашата земја да се претвори во друга Украина. Ние многу ја цениме посветеноста на премиерот на оваа идеја и лично сум убеден дека до крајот на деценијата Грузија навистина ќе биде подготвена, во својата најдобра форма, да стане земја членка на ЕУ. Ќе направиме се за да ви помогнеме – нагласи тој на заедничката прес-конференција со грузискиот премиер Иракли Кобахидзе.