Општина Карпош: „Скопје на вода“ нема да има

Груба лага и манипулација се тврдењата за некакви проекти налик на искуства од други држави во регионот. Ниту сме планирале ваков тип на урбанизација ниту планираме. Свесното извртување на факти и пласирањето на ноторни лаги е опасна игра со јавноста која остро ја осудуваме, велат од Општина Карпош, по сѐ погласните најави дека на потегот од СЦ „Борис Трајковски“ до мостот на „Љубљанска“ ќе се градат станбени згради, дури 42, по теркот на  „Белград на вода“.

Велат дека работат на средување на урбанистичкиот хаос кој го наследиле, и дека сите започнати постапки од претходното раководство, преку надлежната комисија за урбанизам се дадени на ревидирање и повторно разгледување.

„Сето ова е преземено со цел да се заштити интересот на граѓаните, развојот на зелениот простор во општината, хуманото уредување на просторот во рамки на законската регулатива. Карпош ќе се развива според потребите на карпошани и во директна консултација со карпошани. Новото раководство на општината ќе работи само и исклучиво во
интерес на граѓаните на Општина Карпош“, уверуваат од таму.

За сите информации кои произлегуваат од постапката за донесување на детален урбанистички план во иднина, преку анкети и сооштенија, навремено и транспарентно ќе бидат информирани граѓаните и пошироката јавност, додаваат од Карпош.

Пред неколку дена од „Независни за Карпош“ објавија дека „42 згради се планира да се изградат од ‘Александар палас’ до изворите на Лепенец, помеѓу ‘Илинденска’ и Вардар“.