Од безбедносни причини: Се укинува фестивалот на античка драма „Стоби“
Во амфитеатарот во Стоби овој јули прекината е 17-годишната долга традиција на Интернационалниот фестивал на античка драма „Стоби“, кој по три години преместување на сцената на затворено во велешкиот театар, ланското лето повторно беше вратен на отворената древна сцена во Стоби на радост на многубројната публика.
Градоначалникот Аце Коцевски вели дека причина е што Министерството за култура на велешкиот театар не му одобрило финансиски средства за премиерна традиционална претстава во Стоби. Воедно потсети и дека Фестивалот од Министерството за култура не беше поддржан при годинашната буџетска распределбата на средства за културни манифестации.
– Ние со нашиот скромен буџет не можевме да ги покриеме трошоците за покривање на фестивалот – појасни Коцевски.
Министерот за култура Хусни Исмаили на новинарско прашање при неговата посета во Стоби на 12 јули годинава, дали Министерството за култура би издвоило средства за одржување барем една претстава, појасни дека тие финансиски би ја поддржале, но само ако се исполнат безбедносните услови во амфитеатарот, за што тој бил информиран од директорот на НУ Стоби.
Во писменото известување за медиумите од НУ Стоби, при посетата на премиерот Зоран Заев во Стоби на 12 јули годинава, информирајќи за тековните активности во Стоби, тие воедно појаснија дека стручниот тим и раководителот на проектот за истражување, конзервација и реставрација на театарот во Стоби, се на мислење дека театарот не е во состојба да прима публика од безбедносни и морално етички причини. Освен во строго контролирани услови и со ограничен број на посетители, сè додека тој не биде конзерваторско-реставраторски третиран од страна на стручниот тим. Според нив, секој пројавен интерес за користење на театарот е добредојден, но со стручен надзор и пропишани услови од страна на НУ Стоби.
Како што појаснува Спасе Перовски, директор на НУ Стоби, во амфитеатарот во Стоби веќе завршиле истражувачките и моментално се извршуваат конзерваторските работи и реконструкцијата на амфитеатарот.
– Може да дојде публика во амфитеатарот во Стоби, но затоа ние како стручен тим на НУ Стоби треба да процениме во колкав број, поради безбедносни причини. Тоа значи дека за разлика од изминатите лета кога имаше повеќеилјадна публика, сега при евентуално одржување на театарска претстава би требало да се намали бројот на публика, а посебно во стариот дел од амфитеатарот. Во новиот реконструиран дел од гледалиштето на амфитеатарот, наскоро треба да бидат поставени и мермерните седишта – информира Перовски.
Тој потенцира дека досега до нив не било доставено ниедно барање за одигрување на театарска претстава.
Во амфитеатарот во Стоби ансамблот на велешкиот театар во 1992 година ја одигра првата претстава во Стоби и оттогаш по една секое лето сè до 2001 година.
Во рамките на фестивалот беа одиграни 80-ина антички претстави со театарски ансамбли од Русија, Украина, Холандија, Турција, Србија, Црна Гора, Хрватска, Босна и Херцеговина, Бугарија, Ерменија, Данска, Казахстан, Албанија и од земјава.