Независните здруженија во последен обид за изборите – ова е институционална репресија
Вчера беа да се пожалат кај претседателката Гордана Сиљановска-Давкова за невозможните услови што им се поставуваат за учество на локалните избори, денес се јавија уште еднаш за скандалозните измени во Изборниот законик.
Независните граѓански здруженија изгледа дека не добиле некоја отворена поддршка од Сиљановска (така барем изгледа од соопштението на нејзиниот кабинет), сега се во последен обид да добијат поддршка од јавноста.
Уште едвај 30 дена до распуштање на Собранието и распишување на локалните избори, а освен заглавениот предлог на Изборниот законик со кој се предвидуваат уште полоши решенија од оние што Уставниот суд ги укина на 20 мај – не гледаме никаков друг напор од пратениците, народните претставници, да си ја исполнат својата улога на чувари на Уставот и на демократијата, велат во нивното денешно соопштение независните.
„Затоа, бараме во најкус можен рок заглавените противуставни измени на Изборниот законик да се повлечат и да се предложат нови кои ќе бидат во линија со одлуката на Уставниот суд У.бр.186/2024:
- Да се постави услов од 20 до 100 собрани потписи и 200 собрани потписи за Град Скопје за независни листи на кандидат/и, по пример на бројните европски држави;
- Да се дозволи собирање потписи на терен и надвор од канцелариите на ДИК, како во европските земји;
- Да се зголеми периодот на собирање потписи на 30 дена;
- Да се дозволи името на советничките независни листи да биде во целост наведено на избирачкото ливче, а не како досега само името на носителот;
- Да се обезбеди еднаквост меѓу сите политички чинители во утврдувањето на редоследот на единствената листа на кандидат/и за избор на претседател, пратеници, членови на совет, односно градоначалник, со ждрепка;
- Да се промени одредбата за пристап до медиумскиот простор и финансирањето на изборната кампања.
Бараме при поднесувањето на новите измени на Изборниот законик да се организира јавна расправа со вклучување на сите чинители, вклучително независните кандидати кои се најзасегнати, но и министерството за правда и претседателката Гордана Сиљановска-Давкова, како и набљудувачките мисии во земјава“, стои во нивното соопштение.
Потоа се додава дека правото на македонските државјани да се кандидираат за јавни функции е уставно загарантирано уште со осамостојувањето на Републиката и е право кое е слободно практикувано повеќе од три децении. Оттука, доколку овој пратенички состав не овозможи фер услови за излегување на независни кандидати на избори преку Изборниот законик, или свесно спречи учество на независните, ќе биде прв во историјата на македонската независност што бескрупулозно ставил потпис на институционално бришење на граѓански права што е исклучително опасен преседан со несогледливи последици.