Монографијата за Кире Костов ја собра музичката елита во Скопје

Монографијата „Летај низ солзи мои, галебе мој тажен“ за легендарниот композитор, диригент  и хитмејкер Кире Костов (1949-2023), насловена по неговиот голем хит кој го испеа Верица Ристевска, синоќа во „Дајмонд мол“ ја собра музичката елита од сите генерации и по некој лик од претходните влади на ВМРО-ДПМНЕ.

Книжарницата на „Литература.мк“ беше претесна да ги прими сите гости, пријатели, соработници и почитувачи на неговото дело. Верица Ристевска, која го испеа евергринот „Галебе“, беше меѓу гостите на промоцијата, како и Славе Димитров со синовите Дарко и Оливер, Зорица Поп-Панкова, Ѓокица Лукаревски, Елена Ристеска, Лидија Кочовска со родителите Невена и Панче, Александар Митевски, Љупчо Мирковски, Мартин Вучиќ, д-р Миодраг Врчаковски, Снешка Георгиевска, Елизабета Канчевска-Милевска, Викторија Васева-Димеска, д-р Драган Даниловски, Биљана Драгичевиќ Пројковска…

Костов е автор на околу педесетина композиции во оркестарска изведба од областа на џезот,  и на тристотини наслови кои ја обележаа македонската поп-музика, а некои од нив останаа евергрини како „Кога те нема“, „Твоите очи сине“, „Синот божји“, „Тајно моја“, „Кој да ти каже“,„Летај низ солзи мои, галебе мој тажен“… Во чест на Костов, на 11 ноември ќе се одржи и концерт во Националната опера и балет (НОБ).  Режисер е Дејан Пројковски, ќе свири голем оркестар, а засега е договорено дека ќе пеат Каролина Гочева, Лидија Кочовска, Елена Ристеска, Ѓоко Танески, Драган Мијалковски и други.

Монографијата која се подготвуваше две години, го осветлува животниот пат и грандиозното дело на маестро Костов – низ фотографии, сведоштва и архивски материјали што сведочат за неговиот влог во македонската култура. Автори на монографијата се Снежана Анастасова-Чадиковска – македонска пијанистка, пијано педагог, музички публицист и организатор и Марко Коловски – музиколог, публицист, новинар и општественик. Визуелниот идентитет го креираше Методија Ачевски, а изданието е реализирано во печатницата „Бранко Гапо“. Промотор на монографијата синоќа беше проф. д-р Александар Трајковски – музички теоретичар, истражувач, педагог и публицист, а модератор на промоцијата Живкица Каленикова. На настанот се обрати и Кармен Костова, академски музичар и пијано педагог, сопруга на Кире Костов, која е иницијатор на проектот.

 

 

„Мојот живот го поминав со еден композитор и надарен човек од една страна, од друга страна еден многу топол човек со широко срце. Благодарна сум што мојот сопруг не сакајќи ни нацрта една линија и знам дека сакаше неговото семејство никогаш да не биде под линијата на човештината и професионализмот. Благодарам на моите ќерки и внуки кои се секогаш до мене во еден навистина тежок и несекојдневен период, знаеле да помогнат“, рече Костова на промоцијата.

 

Монографијата има околу 250 страници е поделена во два дела. Во првиот дел е животот на Кире Костов со повеќе соговорници, неговите пријатели и соработници.Вториот дел е анализа на делата на Кире Костов како трубач, композитор и како педагог, диригент на џез оркестарот на Факултетот за музичка уметност (ФМУ). Тој е еден од основачите на Отсекот студии популарни жанрови на ФМУ. (Л.С.)