Мицкоски вели мора да се има концепт, најави ново задолжување од Унгарија по Нова година

Половина од 500-те милиони евра кои земјава ги договори со Унгарија, ќе бидат за општините, а половина за бизнисот, рече денеска премиерот Христијан Мицкоски. Како што објасни, општините ќе ги користат парите за конкретни проекти кои би им го подобриле животот на граѓаните, а фирмите ќе добијат помош поради актуелните лоши пазарни услови, но за сметка на тоа ќе треба да „вратат“ со инвестиции, најмалку 5.000 нововработени и раст на производството од пет отсто над стапката на инфлација.

Според него, избрзани се реакциите на некои од политичарите дека ветил една милијарда евра, а донел 500 милиони. Средствата, рече тој, се обезбедуваат согласно потребите. Соработката со Унгарија не е ограничена, рамката е отворена, а во моментов се потребни 500 милиони и затоа се само толку обезбедени. 

Мора да се има концепт, дополни Мицкоски, а идејата е од ништо да се направи нешто зашто состојбата што ја наследи Владата е алармантна.

„Од ова ништо што ни го оставија, да направиме нешто, е тоа го правиме ние сега, се мачиме да обезбедиме повеќе. Веднаш избрзаа со критика, ‘вети милијарда, донесе 500’. Сега се 500 милиони. Имаме обврзница што ја земаа под ултра лоши услови, а таа доспева на 25 јануари. Зошто сега да земеме 500 милиони па граѓаните да плаќаат камата, кога можеме во јануари. Отворена ни е рамката. Зошто сега да плаќаме 10 – 15 милиони евра, ќе направиме вакви сали уште 30, зошто да ги трошиме тие пари? Мора да имате концепт, со пари сите знаат, но идејата е од ништо да направите нешто. Поентата е од ова ништо што ни го оставија, да направиме нешто, е тоа го правиме ние сега, се мачиме да обезбедиме повеќе“, истакна премиерот.

Одговорајќи на новинарски прашања по посетата на Охрид, Мицкоски повтори дека договорените 500 милиони евра со Унгарија се, всушност, специјална економска соработка на ниво на влади.

„Ова е вид соработка која не е ограничена. Условите што ги има на пазарот се најмалку 2,5 пати полоши: 6-7 отсто камата без греј период, пократок период на отплата. Практично, денеска е така доведен системот во бизнисот да добива кредит само оној на кој не му треба. На тој што му треба, не може зашто му бараат од сертификат за раѓање. Затоа, ние велиме, ‘еве, ова е поддршка од нас како Влада, а која е вашата обврска како бизнис?’ Вашата обврска е барем уште толку да имате средства кои ќе ги инвестирате на овие 250 милиони, тоа се половина милијарда инвестиции да обезбедите годишно, најмалку 5.000 нововработени и раст на производството пет отсто над стапката на инфлација, нагласи Мицкоски.

Тоа, подвлече, ќе се бара од бизнсот, зашто „партнерството подразбира две страни“.

„Ние велиме, вие ќе имате инвестициска активност која ќе го зголеми обемот на вашето работење, а нам ни е важно да имаме зголемен домашен производ. И сега, тоа одредени структури од опозицијата ги плаши, си велат ‘овие ќе бидат многу успешни, што ќе правиме ние на локални избори’. Затоа се плашат“, рече Мицкоски.

Тој беше во теренска посета на Општина Охрид, каде врши увид на повеќе проекти.