„Мегарон инженеринг“ и СДСМ: Проектот за Универзална сала е стручен и целосно безбеден

Градоначалничката Данела Арсовска, откако го стопираше проектот за изградба на Универзална сала, по двомесечен молк за причините поради кои го стопирала проектот, вчера ги излажа граѓаните, дека проектот е небезбеден, тврдат од владејачката СДСМ, но и од фирмата која го изработи проектот.

– Не е точно дека проектот за изградба на Универзална сала е небезбеден. Проектот е професионално сработен и одобрен од стручни лица и целосно е безбеден. Овој проект е пратен на мислење на Градежен факултет од каде е одобрен. Одобрен е и од Институтот за сеизмолошки истражувања со што се потврдува неговата безбедност и стабилност за градба. Надзорот за изградба ги има одобрено сите градежни зафати. Сите постапки и процедури за изградба на Универзална сала се запазени во целост – велат од СДСМ.

Истото го тврди и фирмата која го изработи проектот, „Мегарон инженеринг“.

– Проектот за фасадата и куполата се предаде на Град Скопје заедно со стручна ревизија на проектната документација и со позитивно мислење од страна на ИЗИИС и така доби решение за адаптација од Општина Центар. ‘Мегарон инженеринг‘ изработи ревидиран проект за челичната конструкција, откако на лице место се утврдија неправилности на постојните темели и плочи и откако се утврди потреба од нови конструктивни елементи. Таквиот ревидиран проект е повторно пратен во ИЗИИС и повторно е добиено второ позитивно мислење. Сите позитивни мислења и ревизии на проектната документација се предадени во Град Скопје. Ваквите промени се очекувани при зафати на реконструкција на постојни објекти и се во обем кој во никој случај не ја загрозува стабилноста на објектот и безбедноста на луѓето – реагираат на вчерашната прес-конференција на градоначалничката Арсовска од „Мегарон инженеринг“.