Малолетник со петарда запaлил тенда на угостителски објект во Свети Николе

Малолетник од Свети Николе синоќа со петарда запалил тенда на угостителски објект на плоштадот „Илинден“.

Портпаролот на СВР-Штип, Гордана Панајотова информира дека во 19:30 часот во Полициската станица Свети Николе било пријавено дека околу 19:20 часот малолетник фрлил пиротехничко средство во угостителски објект на плоштад „Илинден“ во Свети Николе, при што настанал пожар на тендата на угостителскиот објект.

-Увидна екипа на ОВР Свети Николе извршила увид на местото на настанот, а за случајот бил известен Јавен обвинител и Центар за социјална работа и по документирање на случајот ќе биде поднесен соодветен поднесок, се вели во писменото соопштение од СВР-Штип.

Секторот за внатрешни работи-Штип апелира родителите да внимаваат нивните деца да не употребуваат пиротехнички материјали, зашто тие можат брзо и лесно да предизвикаат сериозни последици по нивното здравје, односно да им причинат повреди на рацете, очите и другите делови од телото.

Покрај тоа, а зависно од другите околности и последици, активирањето пиротехника може да биде и кривично санкционирано, доколку непосредно ја доведе во прашање безбедноста и на други граѓани.