Македонското слово како мост меѓу културите на 59. Меѓународен семинар во Охрид

Македонското слово како мост меѓу културите беше една од темите на дискусијата во рамки на 59. Меѓународен семинар за македонски јазик, литература и култура, што во организација на Универзитетот „Св. Кирил и Методиј“ во Скопје се одржува во Охрид.

На Семинарот учествува и директорот на Македонскиот културно-информативен центар во Софија и дипломатски советник, Зоран Пејковски, кој се осврна на значењето на македонистиката и потребата од нејзино понатамошно развивање и афирмација во меѓународните академски и културни средини.

Тој ја претстави работата на бугарскиот писател, издавач и преведувач, Пламен Тотев и на поетесата и преведувач, Наталија Димитрова-Недјалкова.

Тотев со својата долгогодишна издавачка и преведувачка дејност придонесува за претставувањето на македонската литература пред бугарската читателска публика. Неговото издавачко портфолио опфаќа повеќе од 80 книги од македонски автори преведени на бугарски јазик.

Димитрова-Недјалкова, како поетеса и преведувач, исто така придонесува за развојот на книжевните и културните врски меѓу двете средини.

Во разговорите било истакнато значењето на преводот, издаваштвото и непосредните контакти меѓу авторите, преведувачите, научниците и културните работници за создавање нови можности за соработка и поширока меѓународна афирмација на македонската литература и култура.

Пејковски на средбата со министерката за образование и наука Весна Јаневска ја претстави и работата на Македонскиот КИЦ во Софија, насочена кон промоција на македонското творештво и создавање културни и академски врски.