Луксузната вила со базен под Пелистер била на инспектор од Општина Битола
Општина Битола потврдува дека еден од објектите кои се предмет на надзор е на вработен во општинската администрација
БИТОЛА – Голема врева во Битола, особено на социјалните мрежи дигна информација која вчера ја сподели општина Битола за утврдени незаконитости и дивоградби во Потпелистерието, селото Дихово и населбата Довлеџик во Битола. Особено бура од коментари се крена по неофицијалната информација дека една од спорните градби во селото Дихово е на вработен инспектор во Општина Битола, познат во градот. Во дворот на вилата има и базен.
Всушност, општина Битола објави не само информација дека за три објекти се утврдени неправилности и преземени се соодветни мерки (два од објектите се наоѓаат на патот за Ниже поле, а еден кај населбата Довлеџик), туку градбите ги покажа и со фотографии, па граѓаните ги препознаа сопствениците.
Во одговор за „Независен“, Општина Битола потврдува дека еден од објектите кои се предмет на надзор е на вработен во општинската администрација. Претходно општината потврди дека од страна на градежната инспекција, извршен е увид на објект во Дихово, за кој во тек е прибирање на потребната документација за постапување, согласно законските надлежности.
„Во врска со поставените прашања, ве известуваме дека градежниот инспектор од Општина Битола, постојано е во редовни контроли на терен. Во текот на вчерашниот ден, по допрен глас, извршен е увид и на објект во сопственост на вработен во Општина Битола. Врз основа на констатираната состојба, во моментот се врши проверка на документацијата и утврдување на евентуални неправилности. Доколку, истите бидат утврдени, ќе биде постапено согласно Закон, како што најави и градоначалникот Тони Коњановски во текот на вчерашниот ден: Законот мора да се применува подеднакво за сите“, стои во одговорот од Општина Битола за „Независен“.
Градоначалникот Тони Коњановски рече дека-„Законот мора да биде еднаков за сите нас!“, и најави зголемените контроли, со зголемена транспарентност и информирање на граѓаните за случаите од јавен интерес, во согласност со важечките закони.
Според информацијата од Општина Битола, градежните инспектори вчера на лице место во населбата Довлеџик ги затекнаа и работниците како градат.
„Кај објектот констатирани се работни активности за монтажа на настрешница – челична конструкција, без претходно обезбедено одобрение за монтажа од Општина Битола. Изготвен е записник за констатираната состојба, а градбата е стопирана.“
Основното јавно обвинителство од Битола ги стави под лупа дивоградбите во Битола и Потпелистерието, по што за „Независен“ најавува дека ќе се утврдува дали се предмет на кривично дело.
„Согласно своите законски овластувања, со цел утврдување на евентуално постоење на кривични дела кои се гонат по службена должност, ОЈО Битола издаде наредби до Општина Битола и Дирекцијата за заштита и спасување со насоки за проверка на состојбата на терен во мв. Довлеџик од аспект на нивните законски надлежности. Очекуваме доколку се утврдат неправилности кои потенцијално претставуваат сомнение за сторено кривично дело од надлежност на ОЈО Битола, за истото да бидеме навремено известени заради наше понатамошно постапување“, стои во одговорот од ОЈО Битола за „Независен“, и во него се дополнува дека –„Од друга страна, ОЈО има пракса на формирање на предмети по допрен глас, така што и преку тој механизам се испитуваат информациите од јавноста со наводи за сторени кривични дела од надлежност на ОЈО Битола.“
Инаку вчерашната контрола на градежната инспекција на патот за Нижеполе, утврди дека се гради објект од челични профили, а исто така на друг дел од парцелата се изведува конструкција од бетонски столбови, без претходно одобрение за градење издадено од градоначалникот. Од страна на субјектот на надзор укажано е дека освен приложениот имотен лист, не поседува никаква друга документација за градбите. За нелегалните градби ќе следува решение за рушење. И кај другиот објект на излезот од Битола, согласно инспекцискиот надзор, ќе бидат преземени истите мерки. Во овој случај, констатирано е дека објектот е дивоградба, а истиот бил изграден пред десетина години, како хала од челична конструкција покриен со панели и приклучен на електрична мрежа.