Лавров прилично осамен на министерскиот состанок
Иако рускиот министер за надворешни работи е во Скопје нема промена во ставот на Западот за изолација на Москва
Рускиот шеф на дипломатијата Сергеј Лавров меѓу последните пристигна во центарот „Борис Трајковски“ во Скопје каде што се одржува министерскиот состанок на ОБСЕ. Тој ќе биде прилично осамен на масата, бидејќи на министерскиот состанок нема да бидат американскиот државен секретар Ентони Блинкен, шефот на европската дипломатија Жосеп Борел и британскиот шеф на дипломатијата Дејвид Камерон кој по вечерата синоќа исто така си замина од Скопје. Се навестуваше дека по првиот дел од министерскиот состанок ќе си замине и австрискиот шеф на дипломатијата Александер Шаленберг. Франција ја преставуваше министерката за Европа Лоренс Бун, а од Германија дојде шефицата на дипломатијата Аналена Бербок.
Иако наголемо се шпекулираше за средба меѓу Блинкен и рускиот шеф на дипломатијата Сергеј Лавров, реално немаше теоретски шанси за тоа и тие се разминаа целосно, а многу веројатно и други функционери заминаа бидејќи не сакаа да се најдат на иста фотографија со руската делегација и да пуштат сигнал дека се топат односите со Москва.
Од француската дипломатија порачаа дека присуството на рускиот министер не укажува дека односот на Западот кон Русија е променет и дека дека Западот се откажува од обидите да ја изолира Москва, бидејќи значителен дел од членките на ОБСЕ ги осудуваат руските акции во Украина. Австрискиот шеф на дипломатијата Шаленберг на влегување пред состанокот изјави дека „ќе ни треба повеќе а не помалку ОБСЕ“ и дека во актуелната состојба потребна е ваква платформа за дијалог.
„Целосно ги разбирам, особено украинските пријатели кои одлучија да не присуствуваат, но верувам дека ова сѐ уште е организација што ни е потребна, не само за односите кои се особено тешки со Русија, но и за централна Азија и Јужен Кавказ. Затоа, потреба ни е оваа платформа за дијалог и ако ја гледате состојбата на глобалните односи верувам дека во иднина потребата од ОБСЕ ќе биде сѐ поголема, а не помала“, изјави Шаленберг.
Инаку, Македонија не издаде визи за тројца руски новинари кои се акредитираа за Министерскиот совет на ОБСЕ во Скопје.
„Духот на антагонизам и самоволие во ОБСЕ е директен резултат на целосната западна нетрпеливост кон руското медиумско присуство“, изјави по тој повод Марија Захарова, портпаролката на руското Министерствот за надворешни работи, која заедно со нејзиниот шеф, Сергеј Лавров, синоќа пристигна во Скопје.
На министерскиот состанок ќе се разговара за иднината на организацијата и за предизвиците со кои се соочува, а се очекуваат одлуки за изборот на претседавач за 2024 година, за што на подготвителниот состанок на амбасадори на 57-те земји членки неделава во Виена е постигнат консензус тоа да биде Малта. Треба да се одлучува и за буџетот, како и за именувања за клучните позиции во институциите на ОБСЕ. Предвидени се и два пропратни настани: Потпишување на заедничката изјава за борба против корупцијата во Југоисточна Европа преку враќање на имотот и користење на дигитализација по кој ќе следи и адресирање на влијанието на климатските промени врз човековата безбедност во областа на ОБСЕ. (С.Ј.)