Српски „Курир“: СПЦ ќе ја признае ОА место расколничката МПЦ
Утре започнува Саборот на Српската православна црква во Сремски Карловци на коа меѓу другото ќе се дискутира и за примањето на МПЦ-Охридска Архиепископија во канонското единство.Соборот на СПЦ треба официјално да ја потврди одлуката на вселенскиот патријарх Вартоломеј за признавање на автономната Охридска архиепископија наместо досега непризнатата т.н. Македонската Православна Црква (МПЦ), пишува српски „Курир“ во штотуку објавениот подолг осврт на оваа тема, изнесувајќи податок дека на почетокот на мај, архиепископот Стефан и српскиот патријарх практично го договориле овој чин, но Вартоломеј побрзал за да ги преземе заслугите.
– Српската црква ќе го признае единството со сегашните расколници во Северна Македонија во рамките на Охридската архиепископија. Сакаше да го направи тоа сама, но намерно беше спречена од вселенскиот патријарх Вартоломеј, кој сакаше да испадне дека оваа одлука за канонско признавање на свештенството на поранешната расколничка црква во Северна Македонија е донесена исклучиво благодарение на него. И точно е дека хиерархијата на СПЦ, на чело со патријархот Порфириј, била подготвена да договори црковна заедница со расколниците, за што директно и индиректно се зборувало во неколку наврати во претходниот период, па дури и на почетокот на мај, кога тие се сретнаа во Ниш – патријархот Порфириј и архиепископот Стефан , придружувани од архиереите на двете цркви – пипува „Курир“ и додава:
– Признавањето на Српската православна црква ќе значи и дека ќе има сериозни кадровски промени во рамките на Православната Охридска Архиепископија (ПОА). ПОА беше автономна архиепископија во Северна Македонија, признаена од вселенскиот патријарх Вартоломеј и сите помесни цркви, а на литургијата требаше да го споменат само српскиот патријарх, како и сите други архиепископи и патријарси во православниот свет. Сега ПОА практично ќе биде преземена од сегашната расколничка хиерархија во Северна Македонија на чело со претходниот расколнички архиепископ Стефан и ќе се вика Охридска архиепископија. А поранешниот архиепископ на ПОА, Јован (Вранишковски), меѓу другото ќе се пензионира и поради тешката здравствена состојба, за што придонесе долгогодишниот прогон од страна на македонските власти, вклучително и повеќегодишните затворски казни, коментира „Курир“.
Патријархот Вартоломеј на 9 мај објави дека Светиот синод на Вселенската патријаршија ја признал црквата на Северна Македонија на чело со Архиепископот Стефан за канонска и валидна во целиот православен свет и со неа се воспоставува канонско и литургиско единство. Константинопол го признава името Охридска архиепископија, што значи дека областа на нејзина јурисдикција е само во границите на Северна Македонија, а употребата на терминот „македонски“ е исклучена, како и какви било деривати на тој термин.
Според„Курир“, другите тројца владици на ПОА, Марко, Давид и Јоаким, кои биле најблиски соработници на Вранишковски, ќе добијат управа на еден од манастирите во Северна Македонија, ќе го задржат епископскиот чин или ќе добијат епархии во рамките на Охридска архиепископија.
– Планот на СПЦ беше да го признае единството со расколниците во Северна Македонија на крајот на овогодинешната седница на Собранието и заедно да ја отслужат првата света архиерејска литургија што ќе означи помирување и обновување на единството – пишува „Курир“ и додава дека Српската православна црква нема имот во Северна Македонија затоа што се што имала и е одземено за време на комунистичкото владеење.
Да потсетиме, зворничко-тузланскиот владика Фотија во беседа по повод Ѓурѓовден, 6 мај, порача дека непризнатата МПЦ на седницата на Собранието на СПЦ ќе се врати на канонско единство со СПЦ.