Ковачевски очекува Мицкоски да се држи до она што го кажа по лидерската средба
Според премиерот, работните групи се вистинскиот формат за договарање на сите детали меѓу СДСМ и ВМРО-ДПМНЕ
Работните групи за продолжување на разговорите за уставните измени се вистинскиот формат во кој треба да продолжи договарање на сите детали меѓу СДСМ и ВМРО-ДПМНЕ, бидејќи секој предлог има свои специфики што треба да се имплементираат и таа имплементација секако дека влијае на европската интеграција на државата, изјави денеска во Скопје премиерот Димитар Ковачевски по презентација на најголемиот регионален саем за вино Wine Vision by Open Balkan.
Ковачевски посочи дека лидерот на ВМРО-ДПМНЕ, Христијан Мицкоски по нивната средба во средата се „обврза да учествува во процесот на носење на потребните одлуки за европска интеграција на државата“.
„Тој негов јавно искажан став и преземена обврска јас ја споделив не само со Централниот и Извршниот одбор на СДСМ, туку и со нашите меѓународни партнери коишто исто така ја следеа таа прес-конференција на која што сите барања што ги имаше ВМРО-ДПМНЕ беа практично прифатени од сите политички субјекти во државата. Гледам вчера и Алијансата му дава дополнителен ветар во грб на ВМРО-ДПМНЕ. Не би сакал да ги коментирам јавните изјави во тој дел, бидејќи сметам дека ако се дадени на митинзи или на такви настани сепак се со некоја друга намена“, рече Ковачевски во одговор на новинарско прашање да го коментира ставот на ВМРО-ДПМНЕ дека „нема потреба од работни групи“, доколку СДСМ не се согласи дека имплементацијата на уставните измени би почнала со членството на земјава во ЕУ.
Премиерот потенцира дека е лошо доколку лидерот на ВМРО-ДПМНЕ се повлече од преземената обврска и од посветеноста на завршување на процесот на уставни измени, како што било договорено на нивната средба.
„Сметам дека доколку тој решил да се повлече од сето она што го кажа на прес-конференцијата, а тоа е дека прифаќа уставни измени, прифаќа впишување во Преамбулата на Уставот на државата на делови од други народи, вклучително и на делови од бугарскиот народ, дека прифаќа да биде дел од Владата заедно со СДСМ и другите коалициски партнери, тогаш треба да го каже тоа на официјална средба“, рече Ковачевски.
Тој потсети дека и ДУИ прифати да не биде дел од владата во која би влегла ВМРО-ДПМНЕ, така што смета дека сите детали треба да продолжат да се договараат на ниво на работни групи доколку, како што рече, „она што беше кажано е кажано искрено“.
Запрашан дали има шанса за уште една лидерска средба, Ковачевски само кусо одговори: „Ќе видиме“.
Во однос на тоа дали по евентуалното формирање на „проширена влада“, пред следните парламентарни избори би се одело на создавање „техничка влада“, Ковачевски рече дека ако ВМРО-ДПМНЕ влезе во Владата тогаш би било подобро да не се прави техничка влада.