Кој нареди да се повлече обвинението против Максим Димитриевски, прашува СДСМ

Откако само пет дена пред завршните зборови во судската постапка, обвинителството во Куманово без никакво објаснување го повлече обвинение против градоначалникот Максим Димитриевски СДСМ бара одговори зошто е тоа направено и кој дал наредба за таквата постапка.

„Случајот беше воден повеќе од една година, со конкретни обвинувања за злоупотреба на службена положба, за неисполнување на службена должност во врска со издавање дозвола за градба, со нанесена штета од над 3 милиони денари.

Сега, без нови докази, без промена на фактите, обвинителството едноставно се откажува. По чиј налог? Повикуваме на итна истрага во самото обвинителство – кој го донел решението за повлекување на обвинението и со какви мотиви?

Кој притискал, договарал и овозможил оваа фарса? Кој го штити Димитриевски и зошто?“, изјави денеска Сања Тодоровска од општинската организација на СДСМ во Куманово.

„Ова е класичен пример за неправда – ова е прикривање на одговорност. Обвинителите од тефтерчињата мора да сносат одговорност. Овој срам пред правдата, направен во Куманово и уште еден доказ дека судството е под капата на ВМРО-ДПМНЕ и нивните сателити“, рече таа.