Ќе има ли нови доцнења на испораките од Кина – привремено затворено големо пристаниште

Недостигот на стоки од Азија може да стане уште позабележителен сега кога Кина привремено го затвори третото по големина пристаниште во светот, бидејќи во него се појави случај на Ковид-19.
Имено, главниот терминал во пристаништето Нингбо-Жаушан, од кој стоката се испраќа во Европа и во Северна Америка, беше затворен, бидејќи беше утврдено дека еден работник е позитивен на корона вирус. Кина има многу строга политика за спречување на ширење на инфекцијата и често затвора стопански капацитети, па дури и цели градови, поради само неколку заразени луѓе, пренесува Банкар.ме.

Ова е вторпат оваа година Кина да затвори едно од своите најголеми пристаништа, и бидејќи високо заразната делта варијанта на вирусот се шири и таму, веројатно нема да биде последно затворање.

Експертите предупредуваат дека ваквите одложувања на пратките се последното нешто што ѝ е потребно на глобалната економија погодена од кризата со корона, но Кина е непоколеблива – нејзиниот начин да се бори против вирусот корона е да го спречи неговото ширење.
Терминалот ќе биде затворен до среда, а потоа ќе се разгледа неговото повторно отворање, доколку безбедносните услови се задоволителни.