Кинескиот претседател ја предупреди ЕУ: Донесете ги вистинските стратешки одлуки

Си Џинпинг денеска ги предупреди високите претставници на Европската Унија да „донесат правилни стратешки одлуки“ за време на самитот во Пекинг, додека врвните европски претставници ги истакнаа клучните позиции на ЕУ на самитот со кинеските лидери, нагласувајќи ја потребата од ребалансирање на билатералните односи и решавање на неколку спорни прашања.

Самитот, кој започна денеска, а на кој присуствуваат и претседателката на Европската комисија, Урсула фон дер Лајен, и претседателот на Европскиот совет, Антонио Кошта, се одржува по повод 50 години дипломатски односи меѓу Кина и ЕУ, а на дневен ред се низа прашања – од трговски спорови до војната во Украина.

Си рече дека меѓународната ситуација е сè посериозна и посложена, нагласувајќи ја потребата од зајакнување на комуникацијата, зголемување на меѓусебната доверба и продлабочување на соработката меѓу Кина и ЕУ.

-Кинеските и европските лидери треба да донесат точни стратешки одлуки што ги исполнуваат очекувањата на народот, рече Си.

Фон дер Лајен и Кошта ги изложија клучните позиции на ЕУ за време на самитот со кинеските лидери, нагласувајќи ја потребата од ребалансирање на билатералните односи и решавање на неколку спорни прашања.

Фон дер Лајен рече дека „ребалансирањето на билатералните односи е неопходно“, истакнувајќи дека трговските нерамнотежи и растечката инфлација станаа сериозен предизвик.

-Стигнавме до пресвртница, рече таа, предупредувајќи за економските притисоци што влијаат врз двете страни.

Таа, исто така, ја нагласи важноста од наоѓање законски решенија за намалување на тензиите и несогласувањата, кои се продлабочија како што напредуваше соработката ЕУ-Кина.

-Како што се продлабочуваше нашата соработка, така се продлабочуваа и нерамнотежите, рече фон дер Лајен.

Таа нагласи дека односите Кина-ЕУ се „едни од најважните и најзначајните во светот“, повикувајќи на конструктивна соработка што нема да биде засенета од трговски спорови или недоразбирања.

Кошта нагласи дека ЕУ очекува конкретен напредок од Кина во трговијата и економијата, нагласувајќи ја клучната потреба од постигнување заемно корисни решенија.

Тој, исто така, ја повика Кина да го искористи своето влијание врз Русија за да ја запре војната против Украина, посочувајќи ја важноста од почитување на Повелбата на ОН и меѓународното право.