Кина воведува дополнителни ограничувања за американските фирми

Кина најави нови ограничувања кон американските компании, со дополнително појаснување дека овојпат не се работи само за контрамерки против царината, туку и за безбедносни причини и за прашањето на Тајван.

Кинеските власти објавија дека додале 16 американски субјекти на „листата за контрола на извозот“, тврдејќи дека нивното однесување може да ја „загрози националната безбедност и интересите на Кина“.

Ова значи забрана за извоз на стоки, софтвер и технологија со двојна употреба – оние што можат да се користат и за цивилни и за воени цели – на тие субјекти. Пекинг, исто така, додаде 11 странски компании на таканаречената листа на несигурни субјекти, што им овозможува на властите да воведат казнени мерки против нив.

Министерството за трговија тврди дека овие компании учествувале во „т.н. воена и техничка соработка со Тајван“. Дополнително, на шест американски компании им беа одземени дозволите за извоз, наводно поради загриженост за безбедноста на храната.